អាមេរិក ប្រាប់កញ្ចប់ទឹកប្រាក់ផ្ដល់ឲ្យ អ៊ុយក្រែន ចាប់តាំងពីសង្គ្រាមផ្ទុះឡើង

រដ្ឋមន្ត្រីការបរទេសអាមេរិកលោក Antony Blinken បាននិយាយថា កញ្ចប់ជំនួយសន្តិសុខចុងក្រោយបំផុតចំនួន ១៥០ លានដុល្លារ និងជំនួយយោធាផ្សេងទៀតដែលសហរដ្ឋអាមេរិកផ្ដល់ទៅឲ្យអ៊ុយក្រែន ចាប់តាំងពីសង្គ្រាមលុកលុយរបស់រុស្ស៊ីលើទីក្រុងកៀវបានឈានដល់ប្រហែល ៣.៨ ពាន់លានដុល្លារហើយ ។

លោក Blinken បាននិយាយនៅក្នុងសេចក្តីថ្លែងការណ៍មួយ ដោយប្រកាសអំពីជំនួយបន្ថែមទៀតនេះថា “ជំនួយសន្តិសុខសរុបរបស់សហរដ្ឋអាមេរិកដែលផ្ដល់ដល់អ៊ុយក្រែនមានប្រមាណ ៣.៨ ពាន់លានដុល្លារហើយ ដោយក្នុងនោះមានជាអាវុធ និងគ្រឿងបរិក្ខារផ្សេងទៀតជាដើម” ។

លោកបញ្ជាក់ថា “យើងនឹងបន្តផ្តល់អាវុធដែលកងកម្លាំងរបស់យើងកំពុងប្រើប្រាស់ដល់អ៊ុយក្រែន ដើម្បីការពារប្រទេសរបស់ពួកគេ និងសេរីភាពរបស់ប្រជាពលរដ្ឋរបស់ពួកគេផងដែរ” ។

គួរបញ្ជាក់ថា សង្គ្រាមលុកលុយរបស់រុស្ស៊ីលើអ៊ុយក្រែនដែលលោកប្រធានាធិបតី វ្ល៉ាឌីមៀ ពូទីន ហៅថាជា “ប្រតិបត្តិការយោធាពិសេស” បានអូសបន្លាយពេលជាង ២ ខែមកហើយ បន្ទាប់ពីទីក្រុងមូស្គូបើកការវាយប្រហារលើទីក្រុងកៀវកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ រុស្ស៊ី បាញ់មីស៊ីលប្រឆាំងនាវាមុជទឹកនៅសមុទ្រ ជប៉ុន (មានវីដេអូ)