Marcos Jr ផ្ញើសារប៉ុន្មានម៉ាត់ទៅកាន់ពិភពលោក ក្រោយឈ្នះឆ្នោតប្រធានាធិបតី ហ្វីលីពីន (មានវីដេអូ)

កូនប្រុសអតីតមេដឹកនាំផ្តាច់ការហ្វីលីពីន Ferdinand Marcos បានប្តេជ្ញាកាលពីថ្ងៃអង្គារទី១០ខែឧសភាថា នឹងធ្វើការសម្រាប់ប្រជាជនទាំងអស់ បន្ទាប់ពីជ័យជម្នះដ៏គួរឲ្យភ្ញាក់ផ្អើល ហើយបានប្រាប់ពិភពលោកឲ្យវិនិច្ឆ័យគាត់ ដោយការកាន់តំណែងជាប្រធានាធិបតីរបស់គាត់មិនមែនដោយអតីតកាលរបស់គ្រួសារគាត់ទេ។

លោក Ferdinand Marcos Jr ដែលគេស្គាល់ថា “Bongbong” បានក្លាយជាបេក្ខជនដំបូងគេក្នុងប្រវត្តិសាស្ត្រសម័យទំនើប ដែលឈ្នះសំឡេងភាគច្រើនទាំងស្រុងនៅក្នុងការបោះឆ្នោតប្រធានាធិបតីហ្វីលីពីន ដោយបើកផ្លូវសម្រាប់ការវិលត្រលប់នៃការគ្រប់គ្រងរាជវង្សនយោបាយដ៏ល្បីបំផុតរបស់ប្រទេសនេះ។

លោក Marcos បានប្រាប់ពិភពលោកថា “សូមវិនិច្ឆ័យខ្ញុំ ដោយទង្វើរបស់ខ្ញុំ មិនមែនដោយបុព្វបុរសរបស់ខ្ញុំទេ”។ នេះបើយោងតាមសេចក្តីថ្លែងការណ៍ពីអ្នកនាំពាក្យរបស់គាត់គឺលោក Vic Rodriguez។

លោក Marcos បាននិរទេសខ្លួនទៅ Hawaii ជាមួយគ្រួសាររបស់គាត់ក្នុងអំឡុងការបះបោរ “អំណាចប្រជាជន” ឆ្នាំ ១៩៨៦ ដែលបានបញ្ចប់ការគ្រប់គ្រងរយៈពេល ២០ឆ្នាំរបស់ឪពុកគាត់ ហើយបានបម្រើការនៅក្នុងរដ្ឋសភា និងព្រឹទ្ធសភាចាប់តាំងពីគាត់វិលត្រលប់មកហ្វីលីពីនវិញ ក្នុងឆ្នាំ១៩៩១។

ជ័យជម្នះរបស់លោក Marcos ក្នុងការបោះឆ្នោតកាលពីថ្ងៃចន្ទ បានបង្ហាញច្បាស់ៗ ខណៈ៩៨ ភាគរយនៃសន្លឹកឆ្នោតស្របច្បាប់ ត្រូវបានរាប់ដោយបង្ហាញថា គាត់ទទួលបាន៣១លានសំឡេង ពោលគឺលើសគូប្រជែងជិតដិតបំផុតរបស់គាត់គឺអនុប្រធានាធិបតី Leni Robredo ដល់ទៅទ្វេដងឯណោះ។

ទោះបីជាយ៉ាងណាក៏ដោយ លទ្ធផលផ្លូវការត្រូវបានរំពឹងទុកថា នឹងប្រកាសនៅដំណាច់ខែនេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ ហ្វីលីពីន ជិតរកឃើញអ្នកស្នងតំណែងលោក Duterte ហើយ