អាស៊ានព្រួយបារម្ភខ្លាំងពីការបាញ់សាកល្បងមីស៊ីលថ្មីៗរបស់ឧបទ្វីបកូរ៉េ

អាស៊ាន បានចេញសេចក្តីថ្លែងការណ៍ស្តីពីការព្រួយបារម្ភ ចំពោះការកើនឡើងនាពេលថ្មីៗនេះ នូវការសាក​ល្បងមីស៊ីលអន្តរទ្វីប និងការបាញ់មីស៊ីលរបស់សាធារណរដ្ឋប្រជាធិបតេយ្យប្រជាមានិតកូរ៉េ។

យោងតាមសេចក្តីថ្លែងការណ៍របស់រដ្ឋមន្រ្តីការបរទេសអាស៊ាន ផ្សព្វផ្សាយកាលពីថ្ងៃទី ១០ ខែមិថុនា ទទួលស្គាល់ថា អស្ថិរភាពនៅឧបទ្វីបកូរ៉េ ប៉ះពាល់យ៉ាងធ្ងន់ធ្ងរដល់សន្តិសុខ និងស្ថិរភាពក្នុងតំបន់ អាស៊ានជំរុញឱ្យកូរ៉េ អនុវត្តការអត់ធ្មត់ ដើម្បីកាត់បន្ថយភាពតានតឹង និងជៀសវាងសកម្មភាពដែលអាចធ្វើឱ្យស្ថានការណ៍កាន់តែធ្ងន់ធ្ងរឡើង។

អាស៊ានក៏បានអំពាវនាវឱ្យកូរ៉េអនុវត្ត បានពេញលេញនូវសេចក្តីសម្រេចចិត្តដែលពាក់ព័ន្ធទាំងអស់របស់ក្រុមប្រឹក្សា​សន្តិសុខអង្គការសហប្រជាជាតិ ដោយគិតគូដល់ការអំពាវនាវរបស់សហគមន៍អន្តរជាតិ សូមឱ្យប្រើប្រាស់​មធ្យោបាយការទូត ដើម្បីផលប្រយោជន៍នៃការរក្សាសន្តិភាព និងសន្តិសុខក្នុងតំបន់។

កិច្ចប្រឹងប្រែងផ្នែកការទូត រួមទាំងការបង្កើតបរិយាកាសអំណោយផលសម្រាប់ការសន្ទនា ដោយសន្តិវិធីក្នុងចំណោម​ភាគីពាក់ព័ន្ធទាំងអស់ គួរតែបន្តស្ថិតជាអទិភាព។

ជាមួយគ្នានេះ អាស៊ានបានត្រៀមខ្លួនដើរតួនាទីស្ថាបនា តាមរយៈការប្រើប្រាស់យន្តការដឹកនាំដោយអាស៊ាន ដូចជា វេទិកាតំបន់អាស៊ាន ដើម្បីកាត់បន្ថយភាពតានតឹង និងនាំមកនូវការលុបបំបាត់ទាំងស្រុង នូវអាវុធនុយក្លេអ៊ែរលើ​ឧបទ្វីបកូរ៉េ ដែលអាចផ្ទៀងផ្ទាត់ ហើយមិនក្រឡាស់បាន និងប្រកបដោយសន្តិភាព។

អាស៊ាន បានសង្កត់ធ្ងន់ថា ការសម្រេចចិត្តបាននូវសន្តិភាព និងស្ថិរភាព ក៏នឹងមានប្រយោជន៍ដល់ការអភិវឌ្ឍ និងវិបុលភាពសម្រាប់សាធារណរដ្ឋប្រជាធិបតេយ្យប្រជាមានិតកូរ៉េ ព្រមាទាំងតំបន់ទាំងមូលផងដែរ៕