សង្រ្គាមអាមេរិក-អ៊ីរ៉ង់ ធ្វើឱ្យកូរ៉េខាងជើងកាន់តែរឹងរូស មិនព្រមបោះបង់អាវុធនុយក្លេអ៊ែរ

នៅក្នុងបទសម្ភាសន៍​ជាមួយទស្សនាវដ្តី The Economist ដែល​ចេញផ្សាយ​នា​ថ្ងៃពុធ ទី​១០ ខែ​មិថុនា ឆ្នាំ​២០២៦ នេះ ចំពេលខួបមួយឆ្នាំនៃការឡើងកាន់តំណែងរបស់ខ្លួន ប្រធានាធិបតីកូរ៉េខាងត្បូង លោក Lee Jae Myung បានលើកឡើងថា ជម្លោះសង្រ្គាមដ៏ក្តៅគគុកវាងសហរដ្ឋអាមេរិក និងអ៊ីរ៉ង់ នាពេលបច្ចុប្បន្ន បានក្លាយជាហេតុផលធ្វើឱ្យកូរ៉េខាងជើង កាន់តែលែងចង់បោះបង់ចោលកម្មវិធីអាវុធនុយក្លេអ៊ែររបស់ខ្លួន។

យ៉ាង​ណាមិញ លោក Lee បានបន្ថែមថា «អត្តចរិតប្លែកខុសគេ» របស់ប្រធានាធិបតីអាមេរិក លោក ដូណាល់ ត្រាំ អាចនឹងក្លាយជា «ជំនួយដ៏មានប្រយោជន៍» ក្នុងការអូសទាញកូរ៉េខាងជើងឱ្យត្រឡប់មកតុចរចាវិញ។ ទន្ទឹមនោះ លោក Lee ក៏​បានបញ្ជាក់យ៉ាងច្បាស់​ផង​ដែរ​ អំពីជំហររបស់កូរ៉េខាងត្បូង ក្នុងការមិនបង្កើតអាវុធមហាប្រល័យ​នេះឡើយ ដោយលោកយល់ថា ការដែលកូរ៉េខាងត្បូងចង់មានអាវុធនុយក្លេអ៊ែរផ្ទាល់ខ្លួន មិនមែន​ជា​ជម្រើស​ល្អ និង​មិនអាចទៅរួចទេ។

ក្រឡេកមកមើលស្ថានភាពនយោបាយក្នុងស្រុកវិញ ក្រោយឆ្លងកាត់ការរញ៉េរញ៉ៃពីការប្រកាសច្បាប់អាជ្ញាសឹករបស់អតីតប្រធានាធិបតី Yoon Suk Yeol កាលពីឆ្នាំ២០២៤ លោក Lee បានបង្ហាញជំនឿចិត្តថា កូរ៉េខាងត្បូងអាចឈានឆ្លងផុតដំណាក់កាលមិនប្រក្រតីទាំងនេះ ហើយថែមទាំងអាចអភិវឌ្ឍខ្លួនទៅជាប្រទេសឈានមុខគេមួយ នៅលើពិភពលោកទៀតផង។ លោកថែមទាំងបានលើកឡើងពីគំនិតប្លែកមួយ គឺការចែកលុយឧបត្ថម្ភជាមូលដ្ឋាន ដល់ប្រជាពលរដ្ឋទូទៅ ដោយដកចេញពីប្រាក់ចំណេញដ៏មហាសាលរបស់ក្រុមហ៊ុនបច្ចេកវិទ្យាយក្ស ដូចជា Samsung Electronics និង SK hynix ដែលកំពុងកាក់កបខ្លាំងពីការកើនឡើងនៃតម្រូវការបច្ចេកវិទ្យាបញ្ញាសិប្បនិម្មិត (AI)៕

ប្រែសម្រួល៖ ឈាង