បុរសវៀតណាម ចាក់ប៉ូលិសចរាចរណ៍ ២កាំបិត ដោយសារផាកពិន័យកូន 

បុរសម្នាក់នៅខេត្ត Hai Duong ភាគខាងជើងប្រទេសវៀតណាម ត្រូវបានចាប់ខ្លួនពីបទប្រើកាំបិត វាយប្រហារមន្ត្រីប៉ូលិស បន្ទាប់ពីកូនប្រុសរបស់គាត់ ត្រូវបានផាកពិន័យចំពោះការបើកបរម៉ូតូមិនពាក់មួកសុវត្ថិភាព។

កូនប្រុស​របស់​លោក Nguyen Dang Tuan ឈ្មោះ Nguyen Trung Anh អាយុ១៨ឆ្នាំ មិន​មាន​ពាក់​មួក​សុវត្ថិភាពទេ ពេល​កំពុង​ជិះ​ម៉ូតូ ហើយ​ត្រូវ​បាន​ប៉ូលិស​ឃាត់។ Anh មិនបានបង្ហាញឯកសារចរាចរណ៍ចាំបាច់ណាមួយឡើយ ហើយក៏ទទួលយកការផាកពិន័យដែរ។

ខណៈពេលមន្ត្រីប៉ូលិសចរាចរណ៍ឈ្មោះ Nguyen Dinh Loi កំពុងបំពេញបែបបទ, Tuan ក៏បានមកសុំឲ្យប៉ូលិសកុំផាកពិន័យ។

ប៉ូលិសមិនព្រមឡើយ ប៉ុន្តែ Tuan នៅតែព្យាយាមយកម៉ូតូនិងកូនប្រុសចាកចេញ។ ពេលប៉ូលិសរារាំងមិនឲ្យគាត់ទៅ Tuan ក៏បានយកកាំបិត ប្រវែង ៤៥សង់ទីម៉ែត្រ ពីម៉ូតូរបស់គាត់ ហើយចាក់ប៉ូលិស ២កាំបិត ចំស្មាតែម្តង។

ប៉ូលិសបាននិយាយកាលពីថ្ងៃចន្ទទី១៧ខែតុលាថា បុរសជាឪពុកអាយុ ៤១ ឆ្នាំត្រូវបានចាប់ខ្លួនដើម្បីស៊ើបអង្កេតពីបទ “ប្រឆាំងនឹងមន្ត្រីអនុវត្តច្បាប់ក្នុងពេលបំពេញតួនាទី”៕

ប្រែសម្រួល៖ Vann Vann

ប្រភព៖ VN Express

ចុចអាន៖ គំរាមដកស័ក្ដិ​ប៉ូលិសចរាចរណ៍ ខណៈខ្លួនជិះល្មើសច្បាប់(មានវីដេអូ)