ថៃ ព្រមានខេត្តមួយចំនួន ឲ្យប្រយ័ត្ន បំបែកគ្រាប់រ៉ុកកែត ធ្លាក់ពីលើមេឃនៅថ្ងៃសៅរ៍នេះ

ទីភ្នាក់ងារអភិវឌ្ឍន៍បច្ចេកវិទ្យាអវកាស និងព័ត៌មានវិទ្យា (GISTDA) នៅថ្ងៃព្រហស្បតិ៍ទី០៣ខែវិច្ឆិកានេះ បានចេញសេចក្តីជូនដំណឹងដល់ខេត្តមួយចំនួន ក្នុងប្រទេសថៃ ឲ្យប្រុងប្រយ័ត្នចំពោះបំណែកគ្រាប់រ៉ុកកែត ដែលនឹងធ្លាក់ពីលើមេឃនៅថ្ងៃសៅរ៍ ទី៥ ខែវិច្ឆិកានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រាវជ្រាវជនជាតិថៃ និងជាអ្នកឯកទេសខាងមេកានិចគន្លង មកពី GISTDA លោក Sittporn Chamnarnsin បានរាយការណ៍ថា រ៉ុកកែតចិនឈ្មោះ Longmarch 5B-4Y ត្រូវបានគេគិតទុកថា នឹងធ្លាក់ពីលើមេឃនៅថ្ងៃសៅរ៍នេះ។

បច្ចុប្បន្ន រ៉ុកកែតកំពុងស្ថិតនៅក្នុងបរិយាកាសផែនដី ដែលមានចម្ងាយប្រហែល ១៧៧ គីឡូម៉ែត្រពីដី។ រ៉ុកកែតនេះមានទម្ងន់ ២១.៦តោន ប៉ុន្តែអ្នកជំនាញមិនរំពឹងថា រ៉ុកកែតទាំងមូលនឹងធ្លាក់លើប្រទេសថៃនោះទេ ព្រោះភាគច្រើន វានឹងរលាយ និងឆេះនៅក្នុងបរិយាកាស។

ទោះបីជាយ៉ាងណាក៏ដោយ លោក Sittporn បាន​បង្ហើប​ថា ហានិភ័យ​នៃ​គ្រាប់រ៉ុកកែតដែល​ធ្លាក់លើ​ប្រទេស​ថៃ​គឺ ១,៤%។

អ្នកជំនាញនិយាយថា រ៉ុកកែតនេះ បានធ្វើដំណើរឆ្លងកាត់ប្រទេសថៃចន្លោះម៉ោង ១:៥៤នាទី ដល់ ១:៥៦នាទី រំលងអធ្រាត្រ ដោយឆ្លងកាត់ខេត្ត Chiang Rai, Chiang Mai, Payao, Nan Nong Khai, Udon Thani, Kalasin, Roi Et, Yasothorn, Amnat Charoen និង Ubon Ratchathani។

រ៉ុកកែត ត្រូវបានគេរំពឹងថា នឹងធ្លាក់ចូលទៅក្នុងមហាសមុទ្រ ប៉ុន្តែទិសដៅរបស់វាអាចផ្លាស់ប្តូរ អាស្រ័យលើលក្ខខណ្ឌមួយចំនួនដូចជាអាកាសធាតុជាដើម។ ដូច្នេះ GISTDA សូម​ដាស់តឿន​ដល់​ប្រជាពលរដ្ឋ​ក្នុង​ខេត្តដូចរៀបរាប់ខាងលើ ​ឲ្យ​មានការ​ប្រុងប្រយ័ត្ន​ចំពោះ​វត្ថុដែល​ធ្លាក់​ពីលើ​មេឃ​។

លោក​បន្ត​ថា​ “​ប្រជាពលរដ្ឋ​ ត្រូវ​តែ​តាមដាន​ព័ត៌មាន និង​ការ​ព្រមានឲ្យបាន​ដិតដល់ជាទីបំផុត។ វាអាច​ប៉ះពាល់​ដល់​ជីវិត​មនុស្ស​ច្រើន​ជាង​យើង​គិត​ទៅ​ទៀត”៕

ប្រែសម្រួល៖ Vann Vann

ប្រភព៖ Thaiger

ចុចអាន៖ រ៉ុកកែត ៥ គ្រាប់ បាញ់សំដៅទៅ ព្រលានយន្តហោះក្រុង កាប៊ុល