កូរ៉េខាងជើង បាញ់កាំភ្លើងធំជាង ១០០គ្រាប់ ទៀតហើយ

យោធាកូរ៉េខាងត្បូងនិយាយថា ប្រទេសកូរ៉េខាងជើង បានបាញ់កាំភ្លើងធំប្រហែល១៣០ គ្រាប់ ចូលទៅក្នុងសមុទ្រ ជិតឆ្នេរភាគខាងកើត និងខាងលិចរបស់ខ្លួននៅថ្ងៃចន្ទទី០៥ខែធ្នូនេះ។

ការបាញ់នេះ គឺជាសមយុទ្ធយោធាចុងក្រោយបង្អស់ នៅជិតព្រំដែនរួមគ្នារបស់ប្រទេសទាំងពីរ។

គ្រាប់ផ្លោងមួយចំនួន បានធ្លាក់នៅតំបន់ទ្រនាប់ក្បែរព្រំដែនសមុទ្រ នៅក្នុងអ្វីដែលទីក្រុងសេអ៊ូលនិយាយថា ជាការរំលោភលើកិច្ចព្រមព្រៀងអន្តរកូរ៉េឆ្នាំ២០១៨ ដែលត្រូវបានរៀបចំឡើងដើម្បីកាត់បន្ថយភាពតានតឹង។

ក្រសួងការពារជាតិទីក្រុងសេអ៊ូល បាននិយាយនៅក្នុងសេចក្តីថ្លែងការណ៍មួយថា យោធាកូរ៉េខាងត្បូង បានចេញការព្រមានជាច្រើនទៅកាន់កូរ៉េខាងជើងជុំវិញការបាញ់នេះ។

ទោះបីជាយ៉ាងណាក៏ដោយ កូរ៉េខាងជើងមិនបានរាយការណ៍ភ្លាមៗអំពីការបាញ់កាំភ្លើងធំនេះទេ ប៉ុន្តែខ្លួនបាននិងកំពុងអនុវត្តសកម្មភាពយោធាកាន់តែខ្លាំងឡើងៗ រួមទាំងការបាញ់មីស៊ីល និងសមយុទ្ធដោយយន្តហោះចម្បាំង និងអង្គភាពកាំភ្លើងធំផងដែរ៕

ប្រែសម្រួល​៖ Vann Vann

ប្រភព៖ Alarabiya

ចុចអាន៖ ទីក្រុង សេអ៊ូល ព្រមាន ឆ្លើយ តប ខ្លាំងៗ ទៅ កូរ៉េ ខាង ជើង និងជំរុញឲ្យចិន ធ្វើសកម្មភាព