លោក Zelensky ប្រាប់អាវុធដែល រុស្ស៊ី បើកការវាយប្រហារលើទីក្រុង កៀវ ថ្មីៗនេះ

ប្រធានាធិបតីអ៊ុយក្រែនលោក Volodymyr Zelensky បានបង្ហោះវីដេអូមួយនៅលើប្រព័ន្ធផ្សព្វផ្សាយសង្គមថា រុស្ស៊ីបានប្រើប្រាស់យន្តហោះគ្មានមនុស្សបើក (ដ្រូន) ផលិតដោយអ៊ីរ៉ង់ចំនួន ១៣ គ្រឿងសម្រាប់ការវាយប្រហារថ្មីៗនេះលើទីក្រុងកៀវ ។

អាជ្ញាធរអ៊ុយក្រែនបាននិយាយដែរថា ប្រព័ន្ធការពារដែនអាកាសរបស់ពួកគេក៏បានបាញ់ទម្លាក់យន្តហោះដ្រូនទាំងនោះផងដែរ ដែលបណ្តាលឲ្យអគារចំនួន ៥ នៅក្នុងរដ្ឋធានីកៀវរងការខូចខាត ដោយសារការធ្លាក់យន្តហោះ និងកម្ទេចកម្ទី ខណៈមិន​ទាន់​មាន​របាយការណ៍​ពីការស្លាប់ និងរង​របួសនៅឡើយទេ ​។

លោក Zelensky បញ្ជាក់ថា លោកពិតជាមានមោទនភាពណាស់ចំពោះប្រព័ន្ធការពារដែនអាកាសរបស់ប្រទេសលោក ដែលបង្ហាញពីឥទ្ធិពលដ៏អស្ចារ្យក្នុងការការពារទីក្រុង ហើយលោកក៏បន្តស្នើសុំអាវុធបែបនេះបន្ថែមទៀតផងដែរ ។

ពាក់ព័ន្ធនឹងបញ្ហានេះដែរ អភិបាលក្រុងកៀវលោក Vitali Klitschko បានរាយការណ៍ថា ការផ្ទុះនេះកើតឡើងនៅកណ្តាលទីក្រុងតែម្ដង ប៉ុន្តែប្រព័ន្ធការពារដែនអាកាសរបស់អ៊ុយក្រែនក៏បានបាញ់ទម្លាក់អាវុធគ្មានមនុស្សបើករបស់រុស្ស៊ីផងដែរ ។

ទន្ទឹមនោះ ស៊ីរ៉ែនប្រកាសអាសន្នតាមអាកាសក៏បានចាប់ផ្តើមបន្លឺឡើងផងដែរនៅក្នុងទីក្រុងកៀវ ក៏ដូចជានៅកន្លែងផ្សេងទៀត ពោលភ្លាមៗបន្ទាប់ពីការវាយប្រហារនៅពេលព្រឹកព្រលឹម ហើយបានបន្តរហូតដល់រយៈពេលប្រហែល ៣ ម៉ោងទើបបាត់ទៅវិញ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ប្រមុខសាធារណរដ្ឋ Donetsk ថា អាវុធដែលផ្ដល់ឲ្យ អ៊ុយក្រែន កំពុងដាក់ លក់លើទីផ្សារងងឹត