ប្រមុខសាធារណរដ្ឋ Donetsk ថា អាវុធដែលផ្ដល់ឲ្យ អ៊ុយក្រែន កំពុងដាក់​លក់លើទីផ្សារងងឹត

លោក Denis Pushilin ប្រមុខស្តីទីនៃសាធារណរដ្ឋប្រជាមានិត Donetsk (DPR) បាននិយាយនៅក្នុងបទសម្ភាសន៍ជាមួយសារព័ត៌មាន Sputnik ថា សព្វាវុធបរទេសដែលត្រូវបានផ្គត់ផ្គង់ដល់ប្រទេសអ៊ុយក្រែន រួមទាំងមីស៊ីលប្រឆាំងរថក្រោះ Javelin ផងនោះ ត្រូវបានដាក់លក់នៅលើទីផ្សារងងឹត ជាពិសេសនៅទ្វីបអាហ្វ្រិក ។

លោក Pushilin បាននិយាយថា “ខ្ញុំមិនច្បាស់ ១០០ ភាគរយទេ ប៉ុន្តែឥឡូវនេះសព្វាវុធ​ដែល​បន្តផ្ដល់​មក​ដល់​អ៊ុយក្រែន ​អាចរក​ទិញ​បាន​យ៉ាង​ងាយ ហើយឥឡូវនេះអ៊ុយក្រែនកំពុងក្លាយជាឈ្មួញកណ្តាលមួយនៅលើទីផ្សារងងឹត និងនៅលើបណ្តាញងងឹត ហើយអ្នកអាចទិញអាវុធដែលត្រូវបានផ្គត់ផ្គង់ដល់អ៊ុយក្រែនជាផ្នែកនៃជំនួយ និងការគាំទ្រដោយប្រើឈ្មោះជាបណ្តាប្រទេសលោកខាងលិច” ។

ប្រធានស្តីទីនៃ DPR បានបញ្ជាក់ទៀតថា សព្វាវុធទាំងនោះរួមបញ្ចូលទាំង មីស៊ីលប្រឆាំងរថក្រោះ Javelins ដែលឥឡូវនេះយើងអាចត្រូវបានរកទិញ និងឃើញយ៉ាងងាយស្រួលនៅលើបណ្តាញទីផ្សារងងឹត ហើយសព្វាវុធ​ប្រភេទ​នេះ​កំពុង​ត្រូវ​បាន​ផ្លាស់​ប្តូរ​ក្នុង​បរិមាណ​ដ៏​ច្រើន​ទៅ​កាន់​ប្រទេស​អាហ្វ្រិក​ផង​ដែរ​ ។

ការអត្ថាធិប្បាយរបស់លោក Pushilin បានកើតឡើង ខណៈដែលមន្ទីរបញ្ចកោណបានបង្ហាញកាលពីពេលកន្លងមកថា មិនមានព័ត៌មានដែលអាចជឿទុកចិត្តបានទេថា អាវុធរបស់សហរដ្ឋអាមេរិក ដែលបញ្ជូនទៅអ៊ុយក្រែន ត្រូវបានបង្វែរទៅកន្លែងផ្សេងតាមរយៈមធ្យោបាយខុសច្បាប់នោះ ។

គួរបញ្ជាក់ថា រហូតមកដល់ពេលនេះ សព្វាវុធរាប់ពាន់លានត្រូវបានបញ្ជូនទៅកាន់ប្រទេសអ៊ុយក្រែន ខណៈសន្និសីទអន្តរជាតិស្តីពីការការពារជនស៊ីវិលកាលពីពេលថ្មីៗនេះ ក៏បានសន្យាផ្តល់ជំនួយចំនួន ១.១ ពាន់លានដុល្លារដល់ប្រជាជនអ៊ុយក្រែនឲ្យឆ្លងផុតរដូវរងាឆ្នាំនេះផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អភិបាលតំបន់ Luhansk ថា អ៊ុយក្រែន នឹងបើកការវាយលុកពេញមួយរដូវ រងានេះ