អធិការបតីអាល្លឺម៉ង់លោក Olaf Scholz បាននិយាយកាលពីថ្ងៃពុធថា ប្រទេសអាល្លឺម៉ង់នឹងធ្វើអ្វីគ្រប់យ៉ាងដែលចាំបាច់ទាំងអស់ដើម្បីគាំទ្រដល់អ៊ុយក្រែន ប៉ុន្តែក្នុងពេលជាមួយគ្នានេះ អាល្លឺម៉ង់ក៏ចង់បញ្ចៀសសង្គ្រាមដែលអាចកើតមានរវាងរុស្ស៊ី និងអង្គការណាតូផងដែរ ។

ទោះយ៉ាងណា លោក Scholz ក៏បានការពារការសម្រេចចិត្តរបស់រដ្ឋាភិបាលអាល្លឺម៉ង់ក្នុងការបញ្ជូនអាវុធធុនធ្ងន់ និងរថក្រោះខ្លារខិន Leopards ទៅកាន់អ៊ុយក្រែនផងដែរ ដោយលោកបានគូសបញ្ជាក់ថា ទីក្រុងប៊ែរឡាំងគាំទ្រអ៊ុយក្រែនមែន ប៉ុន្តែក៏មិនចង់បង្កើនកម្ដៅបន្ថែមទៀតជាមួយរុស្ស៊ីដូចគ្នា ។

លោកបាននិយាយថា “ជំនួយទាំងនោះគឺជាវិធានការដែលអាល្លឺម៉ង់ជួយអ៊ុយក្រែនដើម្បីការពារខ្លួនប៉ុណ្ណោះ ហើយការសម្រេចចិត្តទាំងអស់នេះត្រូវបានធ្វើឡើងនៅក្នុងកិច្ចព្រមព្រៀងសហប្រតិបត្តិការជិតស្និទ្ធជាមួយសម្ព័ន្ធមិត្តរបស់យើង ហើយមិនមានកំហុសដ៏គួរឲ្យភ័យខ្លាចណាមួយក្នុងការសម្រេចចិត្តជាឯកតោភាគីលើបញ្ហានេះនោះទេ” ។

ជាចុងក្រោយ អធិការបតីអាល្លឺម៉ង់រូបនេះបញ្ជាក់ទៀតថា ជំនួយសម្រាប់អ៊ុយក្រែនក៏យើងជួយ ហើយជម្លោះជាមួយរុស្ស៊ី និងអង្គការណាតូក៏យើងចង់បញ្ចៀសផងដែរ ហើយលោកបានបដិសេធថា អាល្លឺម៉ង់មិនបានបញ្ជូនយន្តហោះចម្បាំង ឬការដាក់ពង្រាយកងទ័ពជើងគោករបស់ខ្លួននៅក្នុងប្រទេសអ៊ុយក្រែននោះទេ ដោយអាល្លឺម៉ង់យល់ថា ទង្វើទាំងនេះអាចនាំឲ្យមានជម្លោះយោធារវាងរុស្ស៊ី និងណាតូ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu