គណៈកម្មការអឺរ៉ុបបានបញ្ជាក់កាលពីថ្ងៃចន្ទថា ប្រទេសអឺរ៉ុបចំនួន ១៣​ ហើយបានបញ្ជូនក្រុមជួយសង្រ្គោះទៅជួយតួកគី បន្ទាប់ពីជួបគ្រោះរញ្ជួយដីដ៏ខ្លាំងក្លាកម្រិត ៧.៨ រ៉ិចទ័រ ។

លោក Josep Borrell ប្រធានគោលនយោបាយការបរទេសសហភាពអឺរ៉ុប និងលោក Janez Lenarcic ស្នងការសហភាពអឺរ៉ុបសម្រាប់ការគ្រប់គ្រងវិបត្តិ បាននិយាយនៅក្នុងសេចក្តីថ្លែងការណ៍រួមថា ក្រុមអ្នកស្វែងរក និងជួយសង្គ្រោះនៃប្រទេសចំនួន ៨ ដូចជា ប៊ុលហ្គារី ក្រូអាត សាធារណរដ្ឋឆែក បារាំង ក្រិក ហូឡង់ ប៉ូឡូញ និងរូម៉ានី បានប្រមូលផ្ដុំគ្នាយ៉ាងឆាប់រហ័សដើម្បីជួយក្នុងប្រតិបត្តិការរុករកជនរងគ្រោះ ។

ដោយឡែកអ្នកនាំពាក្យ ស្ថាប័ន EU លោក Balazs Ujvari បាននិយាយថា ចំណែកប្រទេសចំនួន ៥ ទៀតដូចជា ហុងគ្រី អ៊ីតាលី អេស្ប៉ាញ ម៉ាល់តា និងស្លូវ៉ាគី ក៏សន្យាផ្តល់ជំនួយក្នុងការចូលរួមសង្គ្រោះ​ដូចគ្នានេះផងដែរ ។

គួរបញ្ជាក់ថា គ្រោះរញ្ជួយដីដ៏សាហាវដែលកើតឡើងនៅកណ្តាលស្រុក Pazarcik ក្នុងខេត្ត Kahramanmaras ភាគខាងត្បូងរបស់តួកគី បានសម្លាប់មនុស្សយ៉ាងហោចណាស់ ២,៣៧៩ នាក់ និងជាង ១៤,៤៨៣ នាក់ផ្សេងទៀតបានរងរបួស ៕

ប្រែសម្រួលដោយ ៖ នាង រតនៈ

ប្រភព ៖ Anadolu

ចុចអាន ៖ សេដ្ឋកិច្ចប្រទេស អាស៊ាន ចំនួន ៤ រួមទាំង កម្ពុជា ផងនោះ នឹងមានកំណើនខ្លាំងក្នុង ឆ្នាំ ២០២៣ នេះ