តុលាការ រុស្ស៊ី កាត់ទោសអ្នកនយោបាយប្រឆាំងម្នាក់ដែលរិះគន់លោក ពូទីន ឲ្យជាប់ពន្ធនាគារ ២៥ ឆ្នាំ

តុលាការរុស្ស៊ីកាលពីថ្ងៃចន្ទបានកាត់ទោសអ្នកនយោបាយប្រឆាំងម្នាក់ដែលនិយាយរិះគន់លើលោកប្រធានាធិបតី វ្ល៉ាឌីមៀរ ពូទីន ឲ្យជាប់ពន្ធនាគាររយៈពេល ២៥ ឆ្នាំពីបទក្បត់ជាតិ ដែលជាការកាត់ទោសដ៏ធ្ងន់ធ្ងរបំផុត ចាប់តាំងពីរុស្ស៊ីបើកប្រតិបត្តិការសឹកលើអ៊ុយក្រែន ។

តុលាការបានរកឃើញថា លោក វ្ល៉ាឌីមៀរ ការ៉ា-មូហ្សា (Vladimir Kara-Murza) មានទោសពីបទក្បត់ជាតិ ជាប់ពាក់ព័ន្ធជាមួយអង្គការដែលរុស្ស៊ីស្អប់ខ្ពើម និងផ្សព្វផ្សាយព័ត៌មានមិនពិតអំពីកងទ័ពរុស្ស៊ី បន្ទាប់ពីទីក្រុងមូស្គូបានបញ្ជូនកងទ័ពចូលទៅក្នុងប្រទេសអ៊ុយក្រែនកាលពីថ្ងៃទី ២៤ ខែកុម្ភៈ ឆ្នាំ ២០២២ ។

ទន្ទឹមនោះ ការចោទប្រកាន់ប្រឆាំងនឹងលោក ការ៉ា-មូហ្សា កើតចេញពីសុន្ទរកថាកាលពីថ្ងៃទី១៥ ខែមីនា ថ្លែងទៅកាន់សភាតំណាងរដ្ឋអារីហ្សូណា នៅក្នុងសហរដ្ឋអាមេរិក ដោយសកម្មជនបក្សប្រឆាំងរូបនេះបានថ្កោលទោសសង្គ្រាមរបស់រុស្ស៊ីនៅអ៊ុយក្រែន ។

គួរបញ្ជាក់ថា លោក ការ៉ា-មូហ្សា អាយុ ៤១ ឆ្នាំដែលជាអ្នកនយោបាយប្រឆាំងវិមានក្រឹមឡាំង កាន់លិខិតឆ្លងដែនចំនួន ២ គឺរុស្ស៊ី និងអង់គ្លេស ហើយសកម្មជនរូបនេះបានចំណាយពេលជាច្រើនឆ្នាំនិយាយប្រឆាំងលោក ពូទីន ។

ជាពិសេសបុរសកូន ៣ រូបនេះបានបញ្ចុះបញ្ចូលរដ្ឋាភិបាលលោកខាងលិចឲ្យដាក់ទណ្ឌកម្មលើរដ្ឋាភិបាលទីក្រុងមូស្គូ និងបុគ្គលរុស្ស៊ីចំពោះការរំលោភសិទ្ធិមនុស្ស ក៏ដូចជាចាត់ទុកសកម្មភាពកងទ័ពរបស់រុស្ស៊ីនៅអ៊ុយក្រែនថាជា “ឧក្រិដ្ឋកម្មសង្គ្រាម” ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ បែកធ្លាយ កាលបរិច្ឆេទ ដែលអ៊ុយក្រែន នឹងវាយបកទ័ព រុស្ស៊ី