បង់ក្លាដែស និងមីយ៉ាន់ម៉ា ជម្លៀសមនុស្សរាប់សែននាក់ ដោយសារព្យុះស៊ីក្លូន ដ៏ខ្លាំងក្លា

អាជ្ញាធរក្នុងប្រទេសបង់ក្លាដែស និងមីយ៉ាន់ម៉ា បានរៀបចំជម្លៀសប្រជាជនរាប់សែននាក់ ដោយព្រមានពួកគេឲ្យនៅឆ្ងាយពីតំបន់ឆ្នេរ ខណៈព្យុះស៊ីក្លូនដ៏ខ្លាំងក្លាមួយ កំពុងវាយប្រហារនៅឈូងសមុទ្រ Bengal។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមនាយកដ្ឋានឧតុនិយមឥណ្ឌា, ព្យុះស៊ីក្លូន Mocha ត្រូវបានគេរំពឹងថានឹងបោកបក់មកលើដីគោកនៅថ្ងៃអាទិត្យទី១៤ខែឧសភាជាមួយនឹងខ្យល់បក់ក្នុងល្បឿន១៦០គីឡូម៉ែត្រក្នុងមួយម៉ោង និងខ្យល់កន្ត្រាក់១៧៥គីឡូម៉ែត្រក្នុងមួយម៉ោង នៅចន្លោះទីក្រុង Cox’s Bazar របស់ប្រទេសបង់ក្លាដែស និងក្រុង Kyaukpyu របស់ប្រទេសមីយ៉ាន់ម៉ា។

មន្ត្រីជាន់ខ្ពស់នៃរដ្ឋាភិបាលបង់ក្លាដែស លោក Muhammad Shaheen Imran និយាយថា ការជម្លៀសមនុស្សជិត ៥០០ ០០០ នាក់ ត្រូវបានគេរំពឹងថានឹងចាប់ផ្តើមនៅថ្ងៃសៅរ៍នេះ ខណៈជម្រកសុវត្ថិភាពចំនួន៥៧៦ ត្រូវបានរៀបចំរួចជាស្រេចសម្រាប់អ្នករស់នៅតាមតំបន់ឆ្នេរ។

ស្របពេលជាមួយគ្នានោះ​ គណៈកម្មាធិការជួយសង្គ្រោះអន្តរជាតិ បាននិយាយនៅក្នុងសេចក្តីថ្លែងការណ៍មួយថា ព្យុះស៊ីក្លូននេះ បានគំរាមកំហែងដល់ជនភៀសខ្លួនរ៉ូហ៊ីងយ៉ា ដែលបានភៀសខ្លួនចេញពីប្រទេសជិតខាងមីយ៉ាន់ម៉ា ហើយកំពុងរស់នៅក្នុងជំរំ Cox’s Bazar។

គួរបញ្ជាក់ថា បង់ក្លាដែស គឺជាប្រទេសដីសណ្តដែលមានប្រជាជនជាង១៦០លាននាក់ ងាយនឹងរងគ្រោះដោយគ្រោះធម្មជាតិ ដូចជាទឹកជំនន់ និងព្យុះស៊ីក្លូនជាដើម។

នៅខែឧសភាឆ្នាំ២០០៨ ព្យុះស៊ីក្លូន Nargis បានវាយប្រហារប្រទេសមីយ៉ាន់ម៉ា ក្នុងតំបន់មានប្រជាជនរស់នៅច្រើន ដោយសម្លាប់មនុស្សយ៉ាងតិច១៣៨០០០នាក់ ខណៈផ្ទះរាប់ម៉ឺនខ្នងនិងអគារផ្សេងៗត្រូវបានបំផ្លាញ៕

ប្រែសម្រួល៖ Vann Vann

ប្រភព៖ AP

ចុចអាន៖ ព្យុះ ណូរុ ឆក់យកជីវិតមនុស្សនៅ ថៃ