អាមេរិក ថា ដល់ពេលវេលាសម្រាប់ឲ្យ ស៊ុយអែត ចូលជាសមាជិក ណាតូ ហើយ

សហរដ្ឋអាមេរិកបានជំរុញឲ្យប្រទេសតួកគីយល់ព្រមលើការចូលជាសមាជិករបស់ស៊ុយអែតទៅក្នុងអង្គការណាតូ ខណៈរដ្ឋមន្ត្រីការបរទេសលោក Antony Blinken បានលើកឡើងថា “វាគឺដល់ពេលវេលាហើយសម្រាប់ប្រទេសអឺរ៉ុបខាងជើងមួយនេះ ក្នុងការចួលរួមជាមួយសម្ព័ន្ធភាពយោធារបស់យើង” ។

ថ្លែងជាមួយនាយករដ្ឋមន្រ្តីស៊ុយអែតលោក Ulf Kristersson, អ្នកការទូតកំពូលរបស់សហរដ្ឋអាមេរិករូបនេះបាននិយាយថា ពីមួយថ្ងៃទៅមួយថ្ងៃ ប្រទេសស៊ុយអែតមានលក្ខណៈសម្បត្តិគ្រប់គ្រាន់ហើយ ក្នុងការចូលរួមជាមួយអង្គការណាតូ ហើយអាមេរិកក៏បានចាត់វិធានការសំខាន់ៗដើម្បីដោះស្រាយបញ្ហាសន្តិសុខស្របច្បាប់របស់ប្រទេសតួកគីផងដែរ ។

លោក Blinken បានប្រាប់អ្នកយកព័ត៌មាននៅទីក្រុង Lulea ភាគខាងជើងប្រទេសស៊ុយអែតថា “តាមទស្សនៈរបស់សហរដ្ឋអាមេរិក ឥឡូវនេះវាដល់ពេលបញ្ចប់ការប៉ុនប៉ងចូលជាសមាជិករបស់ប្រទេសស៊ុយអែតទៅក្នុងអង្គការណាតូហើយ” ។

ប្រទេសស៊ុយអែត និងប្រទេសជិតខាងហ្វាំងឡង់ បានចាប់ផ្តើមស្វែងរកសមាជិកភាពអង្គការណាតូកាលពីឆ្នាំមុន បន្ទាប់ពីសង្គ្រាមលុកលុយរបស់រុស្ស៊ីលើអ៊ុយក្រែន ដោយសារតែក្នុងកតិកាសញ្ញារបស់សម្ព័ន្ធភាពយោធាមួយនេះចែងថា ការវាយប្រហារលើសមាជិកណាមួយរបស់អង្គការ គឺត្រូវបានចាត់ទុកថាជាការវាយប្រហារលើអង្គការទាំងមូល ។

គួរបញ្ជាក់ថា ប្រសិនបើប្រទេសណាមួយចង់ចូលរួមជាមួយអង្គការណាតូ លុះត្រាតែមានការឯកភាពពីប្រទេសជាសមាជិកទាំងអស់ ជាក់ស្ដែងគឺហ្វាំងឡង់ដែលបានចូលរួមជាផ្លូវការក្នុងសម្ព័ន្ធភាពមួយនេះកាលពីខែមុន ខណៈពាក្យសុំចូលរបស់ស៊ុយអែតនៅតែមិនទាន់សម្រេចនៅឡើយទេ ពោលត្រូវការការផ្ដល់សច្ចាប័នពីប្រទេសចំនួន ២ ទៀតគឺហុងគ្រី និងតួកគីនេះឯង ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ លោក Kissinger ថា ដោយសារ វៀតណាម ទើប អាមេរិក ទម្លាក់គ្រាប់បែក មកលើ កម្ពុជា