លោក Kissinger ថា អាមេរិក អាចក្លាយជារដ្ឋឯកោ បើផ្ដោតតែលើផល​ប្រយោជន៍ខ្លួនឯង

អតីតរដ្ឋមន្ត្រីការបរទេសអាមេរិក លោក Henry Kissinger បាននិយាយកាលពីថ្ងៃព្រហស្បតិ៍ថា សហរដ្ឋអាមេរិកនឹងក្លាយជារដ្ឋឯកោ ប្រសិនបើទីក្រុងវ៉ាស៊ីនតោនបរាជ័យក្នុងការធ្វើឲ្យមានតុល្យភាពផលប្រយោជន៍របស់ខ្លួន ជាមួយនឹងតម្រូវការរបស់ប្រទេសផ្សេងទៀត ក៏ដូចជាសហគមន៍ពិភពលោកជាដើម ។

លោក Kissinger បាននិយាយនៅក្នុងបទសម្ភាសន៍ផ្តាច់មុខជាមួយសារព័ត៌មាន Bloomberg ថា “នៅក្នុងសម័យបច្ចុប្បន្ន ការចរចាររកដំណោះស្រាយណាមួយបានផ្លាស់ប្តូរទៅរកទ្រឹស្ដីជ្រុលនិយម ជាពិសេសគឺអាមេរិក ដែលបានអនុវត្តលើរឿងរ៉ាវនេះលើភាគីផ្សេងទៀតមុនគេ ហើយអាមេរិកបានផ្តោតខ្លាំងពេកលើផលប្រយោជន៍របស់ខ្លួន ប៉ុន្តែពួកគេមិនបានផ្ដោតលើផលប្រយោជន៍ជាសកលឡើយ” ។

អតីតអ្នកការទូតរូបនេះលើកឡើងទៀតថា “ទាំងនោះគឺជាបញ្ហាប្រឈមមួយ ហើយនរណាម្នាក់ដែលចង់អនុវត្តគោលនយោបាយការបរទេសរបស់អាមេរិក ត្រូវតែធ្វើឲ្យមានតុល្យភាពរវាងប្រទេសពីរ ហើយបើមិនដូច្នេះទេ អាមេរិកនឹងក្លាយជារដ្ឋឯកោ” ។

កន្លងមករដ្ឋបាលលោក ត្រាំ បានចាត់ទុកវិធីសាស្រ្តគោលនយោបាយការបរទេសរបស់ខ្លួនថាជា “American First” ប៉ុន្តែរដ្ឋបាលលោក បៃដិន វិញមិនបានបន្តគោលនយោបាយនេះនោះទេ ហើយថែមទាំងអនុវត្តគោលនយោបាយរឹងរូសលើបញ្ហាសន្តិសុខជាតិមួយចំនួនចំពោះប្រទេសចិន និងរុស្ស៊ីជាដើម ។

គួរបញ្ចាក់ថា លោក Kissinger ដែលមានវ័យ ១០០ ឆ្នាំ និងជាអ្នកនៅរស់រានមានជីវិតតែម្នាក់នៃរដ្ឋបាលលោកប្រធានាធិបតី Richard Nixon បានបម្រើការនៅក្នុងមុខតំណែងសន្តិសុខ និងការទូតកំពូលមួយចំនួននៅក្នុងសេតវិមាន អំឡុងទសវត្សរ៍ឆ្នាំ ១៩៧០ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ចិន ជំរុញឲ្យ អាមេរិក គោរពរដ្ឋាភិបាលទីក្រុងប៉េកាំងផង