ព័ត៌មានអន្ដរជាតិ

សកម្មជនបរិស្ថានវ័យក្មេងទៅជួបលោក Zelensky ដើម្បីរិះគន់ការបំផ្លិចបំផ្លាញរបស់ រុស្ស៊ី នៅអ៊ុយក្រែន

បានផុស

៩ ខែ មុន

នៅ

ថ្ងៃសុក្រ ៣០ មិថុនា ២០២៣

ដោយ

សកម្មជនបរិស្ថានស៊ុយអែតនាង Greta Thunberg បានទៅជួបជាមួយប្រធានាធិបតីអ៊ុយក្រែនលោក Volodymyr Zelensky ក្នុងទីក្រុងកៀវ ហើយយុវតីម្នាក់នេះថែមទាំងបានបង្ហាញពីទស្សនៈថា រុស្ស៊ីគួរតែទទួលខុសត្រូវចំពោះការបំផ្លិចបំផ្លាញបរិស្ថាននៅអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មជនបរិស្ថានវ័យក្មេងរូបនេះបានអញ្ជើញជួបលោក Zelensky បន្ទាប់ពីរដ្ឋាភិបាលអ៊ុយក្រែនបានបើកកិច្ចប្រជុំលើកដំបូងនៃក្រុមការងារអន្តរជាតិ ដើម្បីវាយតម្លៃការខូចខាតបរិស្ថានដែលបណ្ដាលមកពីសង្គ្រាមលុកលុយរបស់រុស្ស៊ីលើអ៊ុយក្រែន ។

ក្នុងកិច្ចប្រជុំនោះ លោក Zelensky បានប្រាប់ដល់នាង Thunberg និងអ្នកចូលរួមផ្សេងទៀតអំពីការបំផ្លិចបំផ្លាញទំនប់វារីអគ្គិសនីកាលពីដើមខែនេះ ដែលបណ្តាលឲ្យមានទឹកជំនន់នៅក្នុងតំបន់ Kherson ភាគខាងត្បូងអ៊ុយក្រែន ។

ប្រធានាធិបតីអ៊ុយក្រែនរូបនេះបានពន្យល់ថា តំបន់ខ្លះមានទឹកជំនន់ ហើយទីក្រុងជាច្រើនផ្សេងទៀតបែរជាប្រឈមនឹងការខ្វះខាតទឹកផឹក និងទឹកសម្រាប់កសិកម្មទៅវិញ នោះហើយគឺជា “បញ្ហាធំ” ដែលយើងកំពុងជួបប្រទះ ។ ទន្ទឹមនោះ លោកក៏បានអំពាវនាវដល់យុវតីវ័យ ២០ ឆ្នាំរូបនេះឲ្យមានការគាំទ្រ និងធ្វើការវាយតម្លៃការខូចខាតបរិស្ថាននៅក្នុងប្រទេសអ៊ុយក្រែនផងដែរ ។

បន្ទាប់ពីទទួលបានការអំពាវនាវនេះហើយ នាង Thunberg បានប្រាប់អ្នកយកព័ត៌មានថា រុស្ស៊ីមានចេតនាកំណត់គោលដៅដល់ការបំផ្លាញបរិស្ថាន ជីវភាពរស់នៅ និងផ្ទះសម្បែងរបស់ប្រជាជនអ៊ុយក្រែន ហើយសូមក្រុមការងារចូលរួមចំណែក ក្នុងការប្រៀបធៀបចំណុចនេះថាជាគ្រោះមហន្តរាយមនុស្សជាតិឬយ៉ាងណា ។

គួរបញ្ជាក់ថា នាង Greta Thunberg គឺជាសកម្មជនបរិស្ថានវ័យក្មេងមួយរូបដែលបានទាក់ទាញចំណាប់អារម្មណ៍របស់ពិភពលោក តាមរយៈការអំពាវនាវដល់មេដឹកនាំនយោបាយ និងឧស្សាហកម្មឲ្យធ្វើការសម្រេចចិត្តដោយក្លាហានលើការប្រែប្រួលអាកាសធាតុ ខណៈសកម្មភាពរបស់នាងនាពេលកន្លងមក ក៏បានជំរុញឲ្យយុវជននៅទូទាំងពិភពលោកក្រោកឈរការពារភពផែនដីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ធនាគារពិភពលោក ឲ្យ អ៊ុយក្រែន ខ្ចីលុយ ១.៥ ពាន់លានដុល្លារ ខណៈ ជប៉ុន ជាអ្នកចេញមុខធានា