ព័ត៌មានអន្ដរជាតិ

តៃវ៉ាន់ ព្រមានថា ជម្លោះជាមួយចិន នឹងបណ្តាលឲ្យពិភពលោកទាំលមូល ជួបមហន្តរាយ

បានផុស

២ years មុន

នៅ

ថ្ងៃព្រហស្បតិ៍ ៣ សីហា ២០២៣

ដោយ

រដ្ឋមន្ត្រីការបរទេសតៃវ៉ាន់លោក Joseph Wu បានប្រាប់ AFP ក្នុងបទសម្ភាសមួយ កាលពីថ្ងៃពុធទី២ខែសីហាថា “ការលុកលុយរបស់ចិនលើកោះតៃវ៉ាន់ នឹងមានលទ្ធផលដ៏មហន្តរាយ”។ លោកបានព្រមានបែបនេះ ដោយលើកឡើងពីសារៈសំខាន់ជាយុទ្ធសាស្ត្ររបស់ទីក្រុងតៃប៉ិ សម្រាប់ឧស្សាហកម្មគ្រឿងអេឡិចត្រូនិក និងផ្លូវដឹកជញ្ជូនជាសកល។

រដ្ឋមន្ត្រីការបរទេសតៃវ៉ាន់លោក Joseph Wu (រូបថត៖ CNN)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមានរបស់លោក Wu ក៏កើតឡើងផងដែរ ចំពេលកោះតៃវ៉ាន់កំពុងឆ្ពោះទៅរកការបោះឆ្នោតប្រធានាធិបតីនៅឆ្នាំក្រោយ ខណៈប្រឈមមុខនឹងសម្ពាធផ្នែកយោធានិងនយោបាយកាន់តែខ្លាំងឡើងៗ ពីប្រទេសចិន។

ទីក្រុងប៉េកាំង បានទាមទារតៃវ៉ាន់ជាទឹកដីរបស់ខ្លួន ដោយប្តេជ្ញាម្តងហើយម្តងទៀតថា នឹងដណ្តើមយកកោះនេះនៅថ្ងៃណាមួយ ថែមទាំងឈានដល់ការប្រើយោធាផងដែរ ប្រសិនបើចាំបាច់។

ទោះបីជាយ៉ាងណាក៏ដោយ លោក Wu គូសបញ្ជាក់ថា “រាល់សកម្មភាពនៃការប្រើកម្លាំងប្រឆាំងកោះតៃវ៉ាន់ នឹងមានប្រតិកម្មជាសកល។ អ្វីដែលយើងត្រូវធ្វើ គឺពន្យល់ដល់សហគមន៍អន្តរជាតិថា ប្រសិនបើមានជម្លោះណាមួយពាក់ព័ន្ធកោះតៃវ៉ាន់មែននោះ វានឹងមានលទ្ធផលអាក្រក់សម្រាប់ពិភពលោកទាំងមូល ដូចលទ្ធផលចេញពីការវាយលុករបស់រុស្ស៊ីលើអ៊ុយក្រែនអ៊ីចឹងដែរ។ ពិភពលោក នឹងជួបបញ្ហាកង្វះស្បៀងអាហារនិងឥន្ធនៈ ហើយអតិផរណាកើនឡើងខ្ពស់”។

លើសពីនេះ ជម្លោះឆ្លងច្រកសមុទ្រ ក៏បង្កផលវិបាកផ្នែកពាណិជ្ជកម្មដ៏ធំសម្បើមផងដែរ ព្រោះជាង៥០%នៃកុងតឺន័រដឹកជញ្ជូនរបស់ពិភពលោក បានឆ្លងកាត់ផ្លូវទឹកដ៏ធំទូលាយប្រវែង១៨០គីឡូម៉ែត្រ ដែលពុះចែកកោះតៃវ៉ាន់ ពីចិនដីគោក។

តៃវ៉ាន់ ក៏មានសិទ្ធិផ្តាច់មុខលើការផលិត Semiconductor ដែលជាមីក្រូឈីបនិងជាសរសៃឈាមជីវិតនៃសេដ្ឋកិច្ចសម័យទំនើបផងដែរ ហើយតៃវ៉ាន់ ថែមទាំងជាអ្នកផ្គត់ផ្គង់គ្រឿងបង្គុំសព្វាវុធដូចជាមីស៊ីល និងហេដ្ឋារចនាសម្ព័ន្ធការពារទៀតផង៕

ប្រែសម្រួល៖ Vann Vann

ប្រភព៖ CNA

ចុចអាន៖ តៃវ៉ាន់ គំរាមបាញ់នាវាចម្បាំង និងយន្តហោះរបស់ ចិន