កម្អួតត្រីបាឡែននៅ ថៃ អាចលក់បានរហូតដល់ ៤ ម៉ឺនដុល្លារក្នុងមួយគីឡូ​ក្រាម

កម្អួតត្រីបាឡែនត្រូវគេចាត់ទុកជារបស់ដ៏កម្រ និងមានតម្លៃមហាសាល ហើយវាក៏ត្រូវបានប្រើប្រាស់សម្រាប់ក្លិនទឹកអប់ និងក្នុងទឹកអប់ប្រណិតៗផងដែរ ជាពិសេសនៅក្នុងឱសថបុរាណមួយចំនួនជាដើម ។

ចំណែកនៅក្នុងប្រទេសថៃ ប្រសិនបើប្រជាពលរដ្ឋរកបានកម្អួតត្រីបាឡែន ឬគេហៅថា “មាសអណ្ដែត” នឹងអាចលក់បានរហូតដល់ ៤ ម៉ឺនដុល្លារឯណោះក្នុងមួយគីឡូក្រាម ។

ជាក់ស្ដែង កាលពីថ្ងៃទី៣ ខែតុលា ឆ្នាំ២០២១ ប្រជានេសាទម្នាក់រស់នៅខេត្ត Surat Thani ប្រទេសថៃ បានរកឃើញកម្អួតត្រីបាឡែននេះនៅលើឆ្នេរ Niyom ដែលមានទម្ងន់ ៣០ គីឡូក្រាម និងលក់បានតម្លៃរហូតដល់ ១.២ លានដុល្លារ ។

សារធាតុនេះកកើតឡើងដោយស្ពែមត្រីបាឡែនឈ្មោលដែលស៊ីពពួក Cephalopods ដូចជា មឹក និងកូនត្រីសមុទ្រតូចៗ ជាអាហារក្នុងបរិមាណយ៉ាងច្រើន ។ បន្ទាប់មកបំណែកនៃអាហារមួយចំនួនបានរំកិលចូលទៅក្នុងពោះវៀនរបស់ត្រីបាឡែន ហើយភ្ជាប់គ្នាជាដុំរឹងបន្តិចម្ដងៗដែលលូតលាស់នៅខាងក្នុងត្រីបាឡែនក្នុងរយៈពេលជាច្រើនឆ្នាំ ។

ក្រោយមកទៀត ត្រីបាឡែនក៏បានក្អួតចេញដុំរឹងដ៏ធំនោះចេញមក ហើយអណ្ដែតលើផ្ទៃសមុទ្រតែម្ដង ។ ទោះយ៉ាងណា ដំបូងឡើយវាមានក្លិនមិនល្អនោះទេ ប៉ុន្តែបន្ទាប់ពីស្ងួតអស់ វាប្រែក្លិនក្រអូប ផ្អែម និងជាប់បានយូរដែលធ្វើឲ្យវាក្លាយជាគ្រឿងផ្សុំដែលកម្ររកបាន ហើយជាទូទៅគេប្រើក្នុងឧស្សាហកម្មទឹកអប់នេះឯង ៕

ប្រែសម្រួលដោយ ៖ ជីវ័ន្ត

ប្រភព ៖ The National News

ចុចអាន ៖ លោក ថាក់ស៊ីន ប្រាប់មូលហេតុដែលពន្យារពេលវិលចូលស្រុកនៅថ្ងៃទី១០ ខែសីហានេះ