លោក ថាក់ស៊ីន ប្រាប់មូលហេតុដែលពន្យារពេលវិលចូលស្រុកនៅថ្ងៃទី១០ ខែសីហានេះ

អតីតនាយករដ្ឋមន្ត្រីថៃដែលកំពុងរស់នៅនិរទេសខ្លួនលោក ថាក់ស៊ីន ស៊ីណាវ៉ាត់ត្រា បានប្រកាសទទួលស្គាល់ថា លោកពិតជាពន្យារពេលវិលត្រឡប់ចូលស្រុកតាមការគ្រោងទុកប្រាកដមែន ហើយលោកក៏បានប្រាប់ពីមូលហេតុនេះផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ថាក់ស៊ីន បានបង្ហោះនៅលើបណ្ដាញ X ដែលជាវេទិកាប្រព័ន្ធផ្សព្វផ្សាយសង្គមដែលពីមុនត្រូវបានគេស្គាល់ជា Twitter ថា “ខ្ញុំត្រូវការត្រួតពិនិត្យសុខភាព ហើយនឹងពន្យារពេលការវិលត្រលប់ចូលមកប្រទេសថៃវិញ ដែលតាមការគ្រោងទុកដំបូងនៅថ្ងៃទី១០ ខែសីហា” ។

នៅក្នុងសារនោះ លោក ថាក់ស៊ីន បានសរសេរទៀតថា “ខ្ញុំចង់ពន្យារពេលថ្ងៃវិលត្រលប់ទៅប្រទេសថៃវិញ ហើយមិនលើសពី ២ សប្ដាហ៍នោះទេ រាប់ចាប់ពីថ្ងៃទី១០ ខែសីហានេះ ។ ខ្ញុំនឹងជូនដំណឹងពីកាលបរិច្ឆេទ និងពេលវេលាជាថ្មីម្តងទៀត ដោយសារតែនៅពេលនេះគ្រូពេទ្យហៅខ្ញុំទៅពិនិត្យសុខភាព” ។

ទោះជាយ៉ាងណា ប្រភពពីគណបក្សភឿថៃបាននិយាយកាលពីពេលថ្មីៗនេះថា ការវិលត្រលបចូលស្រុកវិញរបស់លោក ថាក់ស៊ីន អាចនឹងត្រូវពន្យារពេលរហូតដល់រដ្ឋាភិបាលដឹកនាំដោយគណបក្សភឿថៃត្រូវបានបង្កើតឡើង ។

ពាក់ព័ន្ធនឹងរឿងរ៉ាវពន្យារពេលវិលត្រលប់ចូលស្រុកវិញរបស់លោក ថាក់ស៊ីន នេះដែរក៏កើតមានឡើង ស្របពេលដែលប្រទេសថៃកំពុងតស៊ូជម្នះភាពជាប់គាំងនយោបាយ បន្ទាប់ពីគណបក្សភឿថៃ ដែលជាគណបក្សធំទី ២ នៅក្នុងសភាជាន់ទាប និងមានអាសនៈសមាជិកសភាចំនួន ១៤១ រូប ត្រូវការប្រមូលសំឡេងពីសមាជិកព្រឹទ្ធសភា និងរដ្ឋសភាយ៉ាងតិច ៣៧៦ នៅក្នុងការបោះឆ្នោតសភាជុំបន្ទាប់ ដើម្បីក្លាយជានាយករដ្ឋមន្ត្រីទី ៣០ របស់ប្រទេសថៃ ក្រោយពេលដែលលោក ភីថា បានបាត់ឱកាសមាស ដោយសារតែគោលបំណងចង់កែប្រែច្បាប់ប្រមាថព្រះមហាក្សត្រ ។

គួរបញ្ជក់ថា គិតត្រឹមពេលនេះលោក ថាក់ស៊ីន បាន​ពន្យារ​ពេល​វិល​ត្រឡប់​ចូលស្រុក​វិញ​ចំនួន ២០ ដង​មកហើយ រាប់ចាប់តាំងពីការសន្យាចូលមកកាលពីដើមខែនេះផងដែរ បន្ទាប់ពីត្រូវបានទម្លាក់ចេញពីអំណាចក្នុងរដ្ឋប្រហារយោធាកាលពីឆ្នាំ ២០០៦ ហើយចាប់តាំងពីពេលនោះមកលោកបានរស់នៅក្នុងលក្ខណៈនិរទេសខ្លួនអស់រយៈពេល ១៧ ឆ្នាំមកហើយ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ លោក Pita និយាយរឿងលទ្ធិប្រជាធិបតេយ្យ ថៃ ក្រោយបាត់ឱកាសមាស ធ្វើជានាយករដ្ឋមន្ត្រី