ឡាវ បង្រៀនភាសា រុស្ស៊ី ដល់សិស្សអនុវិទ្យាល័យក្នុងប្រទេស​

សាលាអនុវិទ្យាល័យចំនួន ២ ក្នុងទីក្រុងវៀងចន្ទន៍ប្រទេសឡាវ បានបើកបង្រៀនសាកល្បងភាសារុស្ស៊ីដល់ សិស្សានុសិស្សដែលជាផ្នែកមួយនៃ​កម្មវិធីសិក្សានៅឆ្នាំក្រោយ ។  

កម្មវិធីភាសានេះ គឺជាផ្នែកមួយនៃកិច្ចសហការរវាងវិទ្យាស្ថានស្រាវជ្រាវវិទ្យាសាស្ត្រអប់រំរបស់ប្រទេសឡាវ ក្រោមក្រសួងអប់រំ និងកីឡា រួមជាមួយមជ្ឈមណ្ឌលវិទ្យាសាស្ត្រ និងវប្បធម៌រុស្ស៊ី តំណាងឲ្យសាកលវិទ្យាល័យរដ្ឋ Tomsk របស់ប្រទេសរុស្ស៊ី ។

ការជ្រើសរើសសិក្សាភាសារុស្ស៊ី គឺមានបំណងពង្រឹងទំនាក់ទំនងអប់រំ និងសម្រួលដល់ការសិក្សាថ្នាក់ឧត្តមសិក្សានៅប្រទេសរុស្ស៊ីសម្រាប់និស្សិតឡាវ ។

ពាក់ព័ន្ធនឹងបញ្ហានេះដែរ ឡាវបញ្ជាក់ថា កម្មវិធីសាកល្បងសិក្សាភាសារុស្ស៊ីតំណាងឲ្យភាពជឿនលឿនយ៉ាងសំខាន់ក្នុងវិស័យអប់រំឡាវ ដែលផ្តល់ឲ្យសិស្សនូវឱកាសដ៏មានតម្លៃក្នុងការទទួលបានភាសាថ្មី និងឱកាស​ខ្ពស់ទៅសិក្សានៅរុស្ស៊ីផងដែរ ។

គួរឲ្យដឹងថា រុស្សីគឺជាអ្នកផ្តល់អាហារូបករណ៍ដ៏ធំបំផុតមួយដល់និស្សិតឡាវ ក៏ដូចជាការចូលរួមយ៉ាងជិតស្និទ្ធជាមួយយោធាឡាវ និងធ្វើសមយុទ្ធយោធារួមគ្នាប្រចាំឆ្នាំដែលមានឈ្មោះថា Laros ផងដែរ ៕

ប្រែសម្រួល ៖ នាង រតនៈ

ប្រភព ៖ Laotian times