ដោយសារហូបត្រីទីឡាបយ៉ាមិនឆ្អិនល្អ ស្ត្រីរដ្ឋ California ម្នាក់ ត្រូវកាត់ដៃជើងចោលទាំងអស់

ស្ត្រីម្នាក់នៅរដ្ឋ California នៃសហរដ្ឋអាមេរិកបាត់បង់ដៃជើងទាំង ៤ ដោយសារឆ្លងបាក់តេរីពីការហូបត្រីទីឡាបយ៉ាមិនឆ្អិនល្អ ។

អ្នកស្រី Laura Barajas វ័យ ៤០ ឆ្នាំ បានចូលបន្ទប់វះកាត់កាលពីថ្ងៃពុធ ទី១៣ ខែកញ្ញា បន្ទាប់ពីគេងពេទ្យអស់រយៈពេលជាង ១ ខែ ។ មុនព្យាបាល ម្រាមដៃ ម្រាមជើង និងបបូរមាត់ខាងក្រោមរបស់គាត់បានប្រែជាពណ៌ខ្មៅ សូម្បីក្រលៀនក៏មិនដំណើរការដែរ ។

ការឆ្លងនេះគឺបណ្តាលមកពីបាក់តេរី Vibrio vulnificus ដែលមជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក (CDC) បានព្រមាន កាលពីថ្ងៃទី១ ខែកញ្ញា ។

យោងតាម ​​CDC មនុស្សអាចឆ្លងមេរោគ Vibrio vulnificus ដោយការទទួលទានអាហារសមុទ្រឆៅ ឬមិនទាន់ឆ្អិន ឬប៉ះមុខរបួសជាមួយទឹកសមុទ្រ។

ជារៀងរាល់ឆ្នាំ នៅសហរដ្ឋអាមេរិកមានករណីនេះចំនួន ១៥០ ទៅ ២០០ ឯណោះ ហើយប្រហែល ១ នាក់ក្នុងចំណោម ៥ នាក់បានបាត់បង់ជីវិត ៕

ប្រែសម្រួល៖ វារី

ប្រភព៖ asianone

ចុចអាន៖ មនុស្ស ៣ នាក់បាត់បង់ជីវិត ដោយសារផឹកទឹកដោះគោក្រឡុកនៅអាមេរិក