លោក McCarthy ថ្លែងបែបណាខ្លះ ក្រោយអស់តំណែងជាប្រធានរដ្ឋសភា អាមេរិក

លោក Kevin McCarthy ដែលអស់សិទ្ធិអង្គុយក្នុងតំណែងជាប្រធានរដ្ឋសភាសហរដ្ឋអាមេរិកទៅហើយនោះ បានប្រាប់ក្រុមការងារមកពីគណបក្សសាធារណរដ្ឋកាលពីថ្ងៃអង្គារថា លោកនឹងមិនឈរឈ្មោះធ្វើជា ប្រធានសភា ម្ដងទៀតនោះទេ ។

លោក McCarthy បានប្រាប់អ្នកយកព័ត៌មាន បន្ទាប់ពីកិច្ចប្រជុំបិទទ្វារជាមួយសមាជិកសភាគណបក្សសាធារណរដ្ឋថា “ខ្ញុំនឹងមិនឈរឈ្មោះជាប្រធានសភាម្តងទៀតទេ ហើយខ្ញុំនឹងមានកិច្ចពិភាក្សាជាមួយសមាជិករបស់គណបក្សសាធារណរដ្ឋដើម្បីជ្រើសរើសបេក្ខភាពថ្មីផ្សេងទៀតផងដែរ” ។

លោក McCarthy បានលើកឡើងទៀតថា “ខ្ញុំមិនសោកស្តាយចំពោះការបាត់បង់តំណែងមួយនេះនោះទេ ព្រោះវាជាទំនួសខុសត្រូវ និងជាការងាររបស់ខ្ញុំ ហើយខ្ញុំក៏មិនសោកស្ដាយចំពោះការផ្ទេរតំណែងទៅឲ្យអ្នកផ្សេងដែរ ជាពិសេសរដ្ឋាភិបាលរបស់យើងត្រូវការស្វែងរកការសម្របសម្រួលថ្មី” ។

នេះជាលើកដំបូងហើយក្នុងប្រវត្តិសាស្ត្ររយៈពេល ២៣៤ ឆ្នាំរបស់អាមេរិក ដែលរដ្ឋសភាបានបោះឆ្នោតក្នុងសំឡេងគាំទ្រ ២១៦ ទល់នឹង ២១០ ដើម្បីដកតំណែងរបស់លោក Kevin McCarthy សមាជិកសភាគណបក្សសាធារណរដ្ឋមកពីរដ្ឋកាលីហ្វ័រញ៉ា នៅពាក់កណ្តាលអាណត្តិកាលពីថ្ងៃអង្គារ ទី៣ ខែតុលា ។

ស្របពេលជាមួយគ្នានេះ ក្រោយលោក McCarthy អស់តំណែងហើយនោះ, លោក Patrick McHenry សមាជិកសភារបស់គណបក្សសាធារណរដ្ឋមកពីរដ្ឋ North Carolina ត្រូវបានប្រកាសឲ្យអង្គុយកៅអីជាប្រធានរដ្ឋសភាស្តីទី រហូតដល់មានការបោះឆ្នោតជ្រើសតាំងថ្មី ។

គួរបញ្ជាក់ថា លោក McCarthy បានជាប់ឆ្នោតជាប្រធានរដ្ឋសភាកាលពីថ្ងៃទី១៥ ខែមករា បើទោះបីជាមានការប៉ុនប៉ងរារាំងពីសំណាក់គណបក្សសាធារណរដ្ឋក៏ដោយ ។ ទោះយ៉ាងណា បុរសវ័យ ៥៨ ឆ្នាំកាន់តំណែងរដ្ឋសភាបានត្រឹមតែរយៈពេល ២៦៩ ថ្ងៃប៉ុណ្ណោះ ហើយក៏ជាអាណត្តិដ៏ខ្លីបំផុតទី ២ ក្នុងប្រវត្តិសាស្ត្រអាមេរិកផងដែរ ក្រោយលោក Michael C. Kerr កាន់តំណែងមួយនេះបានរយៈពេល ២៥៧ ថ្ងៃ ៕

ប្រែសម្រួលដោយ ៖ ជីវ័ន្ត

ប្រភព ៖ Xinhua

ចុចអាន ៖ លោក Kevin McCarthy ក្លាយជាប្រធានរដ្ឋសភាអាមេរិកទី១ ក្នុងប្រវត្តិសាស្ត្រ២៣៤ឆ្នាំ ដែលត្រូវបោះឆ្នោតទម្លាក់តំណែង