អ៊ីស្រាអែល រកឃើញសាកសពសកម្មប្រយុទ្ធហាម៉ាស់ ១៥០០នាក់នៅក្នុងទឹកដី របស់ខ្លួន

យោធាអ៊ីស្រាអែលនិយាយថា ខ្លួនបានរកឃើញសាកសពសកម្មប្រយុទ្ធហាម៉ាស់ ប្រហែល ១៥០០នាក់នៅក្នុងទឹកដីអ៊ីស្រាអែល ខណៈខ្លួនកាន់កាប់ភាគខាងត្បូង និងស្ដារការគ្រប់គ្រងនៅតាមព្រំដែនបានពេញលេញវិញហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លាមៗ គេមិនច្បាស់ទេថាតើចំនួនទាំងនេះ ដូចគ្នាទៅនឹងតួលេខដែលកត់ត្រាដោយ ប៉ាឡេស្ទីន ដែរឬក៏អត់នោះទេ។

យន្តហោះចម្បាំងអ៊ីស្រាអែល បានវាយលុកកណ្តាលទីក្រុង ហ្គាហ្សា ដែលជាទីតាំងរបស់ក្រុមហាម៉ាស់ ជាមួយនឹងការទម្លាក់គ្រាប់បែកឥតឈប់ឈរនៅព្រឹកថ្ងៃអង្គារទី១០ខែតុលា បន្ទាប់ពីនាយករដ្ឋមន្រ្តីអ៊ីស្រាអែល ប្តេជ្ញាសងសឹកក្រុមសកម្មប្រយុទ្ធឥស្លាមមួយនេះ។

សង្រ្គាមរយៈពេល៤ថ្ងៃ បានឆក់យកជីវិតមនុស្សយ៉ាងតិច១៦០០នាក់រួចទៅហើយ (មិនទាន់បូកបញ្ចូលតួលេខខាងលើ) ខណៈអ៊ីស្រាអែល ជួបប្រទះការប្រយុទ្ធគ្នាដោយកាំភ្លើង នៅតាមដងផ្លូវទីក្រុងរបស់ខ្លួនជាលើកដំបូងក្នុងរយៈពេលប៉ុន្មានទសវត្សរ៍មកនេះ។

ក្រុមហាម៉ាស់ ក៏បានគំរាមផងដែរថា ពួកគេនឹងសម្លាប់ចំណាប់ខ្មាំង ប្រសិនបើអ៊ីស្រាអែល បើកការវាយប្រហារសំដៅទៅលើជនស៊ីវិលដោយគ្មានការព្រមានជាមុន៕

ប្រែសម្រួល៖ Vann Vann

ប្រភព៖ AP

ចុចអាន៖ អ៊ីស្រាអែល បញ្ចេញរូបភាព សាកសពគរលើគ្នា ក្រោយក្រុមហាម៉ាស់ វាយប្រហារពិធីបុណ្យតន្ត្រី