ព័ត៌មានអន្ដរជាតិ

ក្រុមហាម៉ាស់ ថា ចំណាប់ខ្មាំងជិត៥០នាក់ត្រូវស្លាប់ ដោយការទម្លាក់គ្រាប់បែករបស់ អ៊ីស្រាអែល

បានផុស

៥ ខែ មុន

នៅ

ថ្ងៃសុក្រ ២៧ តុលា ២០២៣

ដោយ

កងកម្លាំងប្រដាប់អាវុធរបស់ក្រុមហាម៉ាស់ បាននិយាយកាលពីថ្ងៃព្រហស្បតិ៍ទី២៦ខែតុលាថា ចំណាប់ខ្មាំងអ៊ីស្រាអែលជិត៥០នាក់ ដែលជាប់ឃុំនៅតំបន់ហ្គាហ្សាស្ទ្រីប ចាប់តាំងពីការវាយប្រហារថ្ងៃទី៧ខែតុលាមក ត្រូវបានសម្លាប់ក្នុងការវាយឆ្មក់ទម្លាក់គ្រាប់បែករបស់អ៊ីស្រាអែលនៅលើទឹកដីប៉ាឡេស្ទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមនេះបាននិយាយក្នុងសេចក្តីថ្លែងការណ៍មួយ ដែលចេញផ្សាយលើឆានែល Telegram របស់ខ្លួនថា “កងពល Al-Qassam ប៉ាន់ស្មានថា ចំនួនអ្នកទោស Zionist ដែលត្រូវបានសម្លាប់នៅហ្គាហ្សាស្រ្ទីប ដោយសារការវាយប្រហារនិងសម្លាប់រង្គាលរបស់ពួក Zionist បានឈានដល់ជិត៥០នាក់ហើយ”។

ទោះបីជាយ៉ាងណាក៏ដោយ សារព័ត៌មាន AFP មិនអាចផ្ទៀងផ្ទាត់ការអះអាងនេះបានភ្លាមៗទេ។

គួរបញ្ជាក់ជាថ្មី អ៊ីស្រាអែល បានបើកការទម្លាក់គ្រាប់បែក និងបាញ់កាំភ្លើងធំលើតំបន់ហ្គាហ្សា បន្ទាប់ពីក្រុមហាម៉ាស់ ធ្វើការវាយប្រហារយ៉ាងភ្ញាក់ផ្អើលលើទឹកដីអ៊ីស្រាអែលភាគខាងត្បូង។

មុននេះ កងទ័ពអ៊ីស្រាអែលក៏បាននិយាយដែរថា មនុស្សចំនួន២២៤នាក់ ត្រូវបានចាប់ជាចំណាប់ខ្មាំងដោយពួកសកម្មប្រយុទ្ធ ក្នុងអំឡុងពេលការវាយប្រហារដែលបណ្តាលឲ្យមនុស្ស១៤០០នាក់បាត់បង់ជីវិត ភាគច្រើនជាជនស៊ីវិល។

កាលពីថ្ងៃព្រហស្បតិ៍ដដែលនោះ នៅទីក្រុង Tel Aviv, អង្គការតំណាងឲ្យក្រុមគ្រួសារនៃចំណាប់ខ្មាំង បានព្រមានថា ពួកគេលែងមានការអត់ធ្មត់ទៀតហើយ និងបានទាមទារឲ្យមានកិច្ចប្រជុំជាមួយមន្ត្រីរដ្ឋាភិបាលកំពូលជាបន្ទាន់។

ក្រុមនេះនិយាយថា “យើងលែងមានការអត់ធ្មត់ទៀតហើយ ចាប់ពីពេលនេះទៅយើងនឹងប្រយុទ្ធ។ យើងសូមទាមទារឲ្យគណៈរដ្ឋមន្ត្រី និយាយជាមួយយើងនៅពេលនេះ ហើយប្រាប់យើងពីរបៀបដែលពួកគេនឹងនាំចំណាប់ខ្មាំងត្រលប់មកវិញ”៕

ប្រែសម្រួល៖ Vann Vann

ប្រភព៖ Arab News

ចុចអាន៖ លោក Netanyahu បញ្ជាក់គោលដៅចម្បងចំនួន២ សម្រាប់ការវាយចូលតំបន់ហ្គាហ្សា នាពេលដ៏ខ្លីខាងមុខ