លោក Zelensky ថា អ៊ុយក្រែន មានផែនការមួយសម្រាប់ប្រយុទ្ធជាមួយ រុស្ស៊ី តែសុំលាក់សិន

ប្រធានាធិបតីអ៊ុយក្រែនលោក Volodymyr Zelensky បាននិយាយកាលពីថ្ងៃសុក្រថា ប្រទេសរបស់លោកមានផែនការមួយក្នុងការប្រយុទ្ធជាមួយរុស្ស៊ី ប៉ុន្តែនៅពេលនេះ លោកមិនទាន់អាចបង្ហាញព័ត៌មានលម្អិតណាមួយនោះទេ ។

ថ្លែងក្នុងបទសម្ភាសន៍ជាមួយទីភ្នាក់ងារសារព័ត៌មាន Reuters កាលពីពេលថ្មីៗនេះ, លោក Zelensky បានលើកឡើងថា លោកនឹងព្យាយាមផ្ដល់លទ្ធផលជាក់លាក់លើសមរភូមិប្រយុទ្ធជាមួយកងកម្លាំងរុស្ស៊ីនៅចុងឆ្នាំ ២០២៣ នេះ បន្ទាប់ពីការវាយបករបស់អ៊ុយក្រែនកំពុងដំណើរការយ៉ាងរលូន ។

ប្រធានាធិបតីអ៊ុយក្រែនរូបនេះបាននិយាយទៀតថា “យើងកំពុងបោះ​ជំហាន​យឺតៗ​លើសមរភូមិនៅភាគខាង​ត្បូង ហើយ​យើង​ក៏​កំពុងបោះពួនទៅភាគ​ខាង​កើតផងដែរ ជាពិសេសយើងទទួលបានសមិទ្ធិផលមួយចំនួននៅក្នុងតំបន់ Kherson ភាគខាងត្បូង” ។

លោក Zelensky បានបញ្ជាក់ថា អ៊ុយក្រែននឹងព្យាយាមបង្ហើបពីផែនការយុទ្ធសាស្ត្រ ក៏ដូចជាបង្ហាញនូវលទ្ធផលលើសមរភូមិប្រយុទ្ធនៅឆ្នាំនេះ ដោយសារតែវាពិតជាមានសារៈសំខាន់ខ្លាំងណាស់ ព្រោះថា ប្រទេសរបស់យើងបានបាត់បង់ជីវិតប្រជាជនជារៀងរាល់ថ្ងៃ ។

ពាក់ព័ន្ធនឹងបញ្ហានេះដែរ ប្រព័ន្ធផ្សព្វផ្សាយលោកខាងលិចមួយចំនួនបានចុះផ្សាយថា ការអះអាងរបស់លោក Zelensky កើតមានឡើង បន្ទាប់ពីប្រធានាធិបតីអ៊ុយក្រែនរូបនេះកំពុងភ័យខ្លួនថា ជម្លោះរវាងអ៊ីស្រាអែល និងក្រុមហាម៉ាស កំពុងអូសទាញសហគមន៍អន្តរជាតិចេញពីការយកចិត្តទុកដាក់លើអ៊ុយក្រែន ជាពិសេសប៉ះពាល់ដល់ការគាំទ្រផ្នែកយោធាពីសំណាក់លោកខាងលិច ។

គួរបញ្ជាក់ថា រហូតមកដល់ពេលនេះ សង្គ្រាមរវាងរុស្ស៊ី និងអ៊ុយក្រែនដែលផ្ទុះឡើងកាលពីថ្ងៃទី២៤ ខែកុម្ភៈ ឆ្នាំ២០២២ នៅតែបន្តអូសបន្លាយពេល និងមិនមានសញ្ញាថមថយណាមួយឡើយ ខណៈសហរដ្ឋអាមេរិក និងសម្ព័ន្ធមិត្តក៏បានផ្ដល់កញ្ចប់ជំនួយយោធាទៅឲ្យរដ្ឋាភិបាលទីក្រុងកៀវក្នុងតម្លៃរាប់រយពាន់លានដុល្លារផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK