Connect with us

ព័ត៌មានអន្ដរជាតិ

តើ លីបង់ នឹងក្លាយជាភាគីទី ៣ ក្នុងសង្គ្រាមរវាង អ៊ីស្រាអែល-ប៉ាឡេស្ទីន ដែរឬទេ?

បានផុស

នៅ

ក្រៅពីជាប់ដៃធ្វើសង្គ្រាមជាមួយក្រុមហាម៉ាសជិត ២ ខែមកនេះហើយ អ៊ីស្រាអែលក៏កំពុងប្រយុទ្ធគ្នាយ៉ាងសកម្មផងដែរជាមួយក្រុមហេសបូឡានៅតាមព្រំដែន លីបង់-អ៊ីស្រាអែល ដោយបណ្ដាលឲ្យជនស៊ីវិលស្លាប់ និងរបួសជាច្រើននាក់ ។ ទោះជាយ៉ាងណាក៏ដោយ អ្នកនយោបាយ និងអ្នកជំនាញលីបង់មួយចំនួនជឿជាក់ថា រដ្ឋាភិបាលទីក្រុងបេរូតមិនទាន់ត្រៀមខ្លួនជាស្រេចដើម្បីបន្តធ្វើអរិភាពយូរអង្វែងជាមួយអ៊ីស្រាអែលបានទេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនាញមើលឃើញថា រដ្ឋាភិបាលលីបង់មិនទាន់ត្រៀមខ្លួនបានគ្រប់យ៉ាងនៅក្នុងការប៉ះទង្គិចធ្ងន់ធ្ងរណាមួយនៅឡើយទេ ។ ទោះបីជាមានការបាញ់ផ្លោងតទល់គ្នាស្ទើរតែរៀងរាល់ថ្ងៃជាមួយកងកម្លាំងអ៊ីស្រាអែលនៃតំបន់ដែលមានប្រជាជនរស់នៅច្រើនកកកុញនៅភាគខាងត្បូងប្រទេសក៏ដោយ ក៏លីបង់មិនទាន់ត្រៀមខ្លួនរួចជាស្រេចជាភាគីទី ៣ ក្នុងសង្គ្រាមពេញទំហឹងជាមួយប្រទេសជិតខាងមួយនេះឡើយ ។

លោកបណ្ឌិត Ohannes Geukjian សាស្ត្រាចារ្យរងផ្នែកសិក្សានយោបាយ និងដំណោះស្រាយជម្លោះនៅឯសាកលវិទ្យាល័យអាមេរិកបេរូតបានប្រាប់សារព័ត៌មាន Sputnik ថា “លីបង់មិនទាន់អាចក្លាយជាភាគីទី ៣ ក្នុងសង្គ្រាមនេះនៅឡើយទេ ដោយសារតែតំបន់កំពុងបាញ់គ្នាទៅវិញទៅមកជាមួយអ៊ីស្រាអែល មិនមានសមត្ថភាព ក៏ដូចជាការត្រៀមខ្លួនដោះស្រាយវិបត្តិបែបនេះឡើយ” ។

ម្យ៉ាងទៀត លីបង់ក៏កំពុងជួបវិបត្តិដួលរលំផ្នែកហិរញ្ញវត្ថុ និងសេដ្ឋកិច្ចផងដែរ ដូច្នេះប្រទេសនេះមិនអាចប្រើដៃម្ខាងជ្រោងសេដ្ឋកិច្ច និងដៃម្ខាងទប់សង្រ្គាមមួយផ្សេងទៀតបាននោះទេ ។ ប្រទេសលីបង់បានក្ស័យធន ហើយរដ្ឋាភិបាលចាំផ្ទះកំពុងមានភាពអត់ធ្មត់ដើម្បីសម្របសម្រួលក្នុងការផ្តល់តម្រូវការទៅដល់ប្រជាជនរបស់ខ្លួន ខណៈបច្ចុប្បន្នប្រទេសនេះក៏មិនមែនស្ថិតក្នុងសង្គ្រាមឆ្នាំ ២០០៦ ផងដែរ ។ នៅពេលនោះ បណ្តាប្រទេសឈូងសមុទ្របានផ្តល់មូលនិធិជាច្រើនដល់ការកសាងឡើងវិញនូវតំបន់ហេដ្ឋារចនាសម្ព័ន្ធរបស់ប្រទេស បន្ទាប់ពីរងការខ្ទេចខ្ចី និងបំផ្លិចបំផ្លាញ” ។

យ៉ាងណា ទោះស្ថិតក្នុងកាលៈទេសៈអ្វីក៏ដោយ ប្រជាជនលីបង់នឹងរួមគ្នាដៃជាធ្លុងតែមួយប្រឆាំងនូវរាល់ការឈ្លានពាន ក៏ដូចជាអរិភាពណាមួយពីភាគីអ៊ីស្រាអែល ប៉ុន្តែទប់ទល់បានកម្រិតណានោះគឺមិនអាចទាយទុកជាមុនឡើយ ដោយសារតែការរស់នៅក្រោមស្ថានភាពសង្គម និងហិរញ្ញវត្ថុដ៏លំបាកមួយនេះ ។

ទន្ទឹមនោះ ក្រោយពីឃើញការបាញ់ផ្លោងគ្នានៅតាមព្រំដែនភាគខាងត្បូងនៃប្រទេសលីបង់ហើយ និងថែមទាំងមានទាំងអ្នកស្លាប់ និងរងរបួសបែបនេះទៀតនោះ ពលរដ្ឋលីបង់បានបង្កើតញត្តិតាមអ៊ីនធឺណិតដោយអំពាវនាវឲ្យរដ្ឋាភិបាលរបស់ពួកគេកុំឲ្យអូសទាញប្រទេសមួយនេះចូលទៅក្នុងសង្រ្គាម ខណៈរហូតមកដល់ពេលនេះ ទទួលហត្ថលេខាចំនួន ៩,៣៣៣ រួចទៅហើយ ។

ម្យ៉ាងទៀត កងទ័ពអ៊ីស្រាអែលក៏បានបើកការបាញ់ផ្លោង ក៏ដូចជាទម្លាក់គ្រាប់បែកគីមីផូស្វ័រទៅលើទីក្រុង Kafr Kila ដែលជាមូលដ្ឋានរបស់ក្រុមហេសបូឡា និងមានប្រជាជនលីបង់រស់នៅច្រើនកកកុញផងដែរក្នុងការវាយប្រហារដ៏ខ្លាំងក្លាបំផុតមួយ ចាប់តាំងពីថ្ងៃទី៨ ខែតុលាមក ដោយធ្វើឲ្យទីក្រុងព្រំដែនមួយចំនួនរបស់លីបង់កាន់តែជ្រួលច្របល់ទៅៗ ។

ក្នុងរយៈពេល​ប៉ុន្មាន​សប្តាហ៍កន្លងមកនេះ កងកម្លាំង​ការពារ​អ៊ីស្រាអែល (IDF) និង​ក្រុមហេសបូឡាបាន​និង​កំពុងបាញ់តទល់គ្នាឆ្លងព្រំដែនយ៉ាងសកម្ម ខណៈការបាញ់រះគ្រាប់រ៉ុកកែតប្រមាណពី ៣០ ទៅ ៥០ គ្រាប់កន្លងមកនេះពីសំណាក់ក្រុមហេសបូឡា គឺដើម្បីជួយទៅដល់ក្រុមប្រដាប់អាវុធប៉ាឡេស្ទីនហាម៉ាស ដែលកំពុងទប់ទល់នឹងការវាយលុករបស់អ៊ីស្រាអែល ។

រហូតមកដល់ពេលនេះ អ៊ីស្រាអែលនៅតែបន្តធ្វើការវាយប្រហារទាំងតាមផ្លូវអាកាស និងផ្លូវគោកដោយមិនប្រណីដៃលើតំបន់ហ្គាហ្សាស្ទ្រីប រួមទាំងមន្ទីរពេទ្យ កន្លែងស្នាក់នៅ និងវិហារឥស្លាមផងដែរ ចាប់តាំងពីក្រុមហាម៉ាសប៉ាឡេស្ទីនបើកការរវាយប្រហារឆ្លងព្រំដែនកាលពីថ្ងៃទី៧ ខែតុលា និងបានចាប់ចំណាប់ខ្មាំងប្រហែល ២៤០ នាក់ ។

ចំណែកខាងក្រសួងសុខាភិបាលនៅតំបន់ហ្គាហ្សាវិញបានឲ្យដឹងថា ចាប់តាំងពីប្រតិបត្តិការវាយបករបស់អ៊ីស្រាអែលនៅពេលនោះមក ជនស៊ីវិលលើស ១៤,៨០០ នាក់ រួមទាំងកុមារ និងស្ត្រីសរុប ១០,១៥០ នាក់ត្រូវបានសម្លាប់ ខណៈខាងអ៊ីស្រាអែលវិញមានមនុស្សជិត ១,២០០ នាក់បានបាត់បង់ជីវិត ។

ក្រៅ​ពី​ចំនួន​អ្នក​ស្លាប់ដ៏ច្រើនសន្ធឹកសន្ធាប់នេះ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការវាយប្រហារសងសឹករបស់អ៊ីស្រាអែលលើតំបន់ហ្គាហ្សា ក៏បានបណ្ដាលឲ្យមនុស្សជាង ៣៦,០០០ នាក់ រងរបួសផងដែរ ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានអន្ដរជាតិ៥ ថ្ងៃ មុន

ក្មេងស្រីហ្វីលីពីន-កូរ៉េ ដែលត្រូវសេដ្ឋីឌូបៃយកទៅចិញ្ចឹម ពេលនេះមានស្ថានភាពបែបណាហើយ?

ចរាចរណ៍៥ ថ្ងៃ មុន

ករណី​បុករះ​ស្លាប់​៤នាក់​នៅ​ស្ពាន​អាកាស​ឫស្សី​កែវ​ មាន​ម្នាក់​ជា​និស្សិត​ពូកែ​ជំនាញ​ស្ថាបត្យកម្ម និង​នគរូបនីយវិទ្យា

ជីវិតកម្សាន្ដ៣ ថ្ងៃ មុន

លេចមុខតួឯកប្រុសក្នុងរឿង “កងដៃចាំស្នេហ៍” ស្នាងភ្នួស​ សុំឲ្យគ្រប់គ្នាអហោសិកម្ម

ព័ត៌មានអន្ដរជាតិ៣ ថ្ងៃ មុន

យន្តហោះក្រុមហ៊ុនអាកាសចរណ៍ Jetstar មួយគ្រឿង បុកគ្នាជាមួយរថយន្តសន្តិសុខអាកាសយាដ្ឋាន

ព័ត៌មានជាតិ៥ ថ្ងៃ មុន

គម្រោង​ទឹកស្អាត​ធំបំផុត​ចាយ​ទុនជាង ១០០ លាន​​ដុល្លារ​នៅ​បាក់ខែង ​គ្រោង​​ចាប់ផ្តើម​សាងសង់​

Sokha Hotels

ព័ត៌មានពេញនិយម