គ្រូពេទ្យ កូរ៉េខាងត្បូង រាប់ពាន់នាក់បន្តធ្វើបាតុកម្មខ្នាតធំនៅទីក្រុងសេអ៊ូល

គ្រូបពេទ្យកូរ៉េខាងត្បូងរាប់ពាន់នាក់បានធ្វើបាតុកម្មទ្រង់ទ្រាយធំក្នុងទីក្រុងសេអ៊ូលកាលពីថ្ងៃអាទិត្យដើម្បីតវ៉ាចំពោះផែនការរបស់រដ្ឋាភិបាលក្នុងការបង្កើនចំនួនគ្រូពេទ្យ និងចំនួនសិស្សចូលរៀននៅសាលាពេទ្យ ។​ នេះបើយោងតាមការចេញផ្សាយរបស់សារពត៌មាន CNN កាលពីថ្ងៃទី៣ ខែ​មីនា ។

ក្រុមគ្រូពេទ្យដែលជាសិក្ខាកាមប្រមាណ ៨,០០០ នាក់ក្នុងប្រទេសកូរ៉េខាងត្បូងបានចាប់ផ្តើមធ្វើបាតុកម្មតាំងពីថ្ងៃទី២១ ខែកុម្ភៈមកម្ល៉េះ ដោយដាក់ពាក្យលែងធ្វើការ ខណៈ ១ ពាន់នាក់ទៀតបានលាលែងពីការងារចាប់តាំងពីពេលនោះមក ។ ក្រុមគ្រូពេទ្យទាំងនោះបាននិយាយថា រដ្ឋាភិបាលត្រូវតែដោះស្រាយបញ្ហាប្រឈមជាច្រើនពាក់ព័ន្ធនឹងប្រព័ន្ធថែទាំសុខភាពជាជាងបន្ថែមចំនួនវេជ្ជបណ្ឌិត ជាពិសេសពួកគេទាំងនោះមានការខឹងសម្បារយ៉ាងខ្លាំងចំពោះលក្ខខណ្ឌការងារលំបាកៗ រួមទាំងប្រាក់ខែតិច ប៉ុន្តែម៉ោងធ្វើការច្រើន ។

ផែនការរបស់រដ្ឋាភិបាលដែលបានប្រកាសកាលពីខែកុម្ភៈនឹងបង្កើនចំនួនសិស្សចូលរៀននៅសាលាពេទ្យចំនួន ២,០០០ នាក់ដោយចាប់ផ្តើមនៅឆ្នាំសិក្សា ២០២៥ ដែលនឹងនាំឲ្យចំនួនសិស្សសរុបឈានដល់ ៥,០០០ នាក់ក្នុងមួយឆ្នាំ ។ យោងតាមរដ្ឋាភិបាលបានឲ្យដឹងថា គោលការណ៍នេះធ្វើឡើងក្នុងគោលបំណងដើម្បីបំពេញតម្រូវការថែទាំសុខភាពក្នុងប្រទេសដែលមានវ័យចំណាស់លឿនបំផុតមួយរបស់ពិភពលោក និងដើម្បីជំរុញលទ្ធភាពប្រើប្រាស់សេវាកម្មសុខភាពនៅក្នុងតំបន់ជនបទនៃប្រទេសនេះ ។

បូករួមនឹងបញ្ហាប្រឈម កូរ៉េខាងត្បូងក៏មានអត្រាកំណើតទាបបំផុតរបស់ពិភពលោក ដែលបាននិងកំពុងធ្លាក់ចុះជាបន្តបន្ទាប់ ចាប់តាំងពីឆ្នាំ ២០១៥ មក ។

គួរបញ្ជាក់ថា កាល​ពី​ថ្ងៃ​ព្រហស្បតិ៍សប្ដាហ៍មុន រដ្ឋាភិបាលកូរ៉េខាងត្បូង​បាន​ចេញ​បញ្ជា​ឲ្យក្រុមគ្រូពេទ្យត្រឡប់​ទៅ​ធ្វើ​ការ​វិញ ហើយបាន​ព្រមានដក ឬព្យួរអាជ្ញាប័ណ្ណ​គ្រូពេទ្យ​ដែល​ធ្វើ​បាតុកម្មទាំងនោះ ប្រសិន​បើ​ពួក​គេ​មិន​អនុវត្ត​តាម ។ ទោះបីជាមានកាលកំណត់ក៏ដោយ អ្នកតំណាងគ្រូពេទ្យកូរ៉េខាងត្បូងព្រមាននៅតែដើរធ្វើបាតុកម្ម និងបន្តជំរុញឲ្យរដ្ឋាភិបាលធ្វើតាមការទាមទាររបស់ពួកគេ ៕

អត្ថបទ ៖ ប៊ុន សុភាព