លោក ហ្សេលេនស្គី៖ ត្រឹមមួយខែមីនា រុស្ស៊ី ទម្លាក់គ្រាប់បែកជាង ៣ ០០០គ្រាប់ លើអ៊ុយក្រែន

តាមការចុះផ្សាយរបស់ Reuters នៅថ្ងៃពុធទី៣ខែមេសា ប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី និយាយថា ប្រទេសរុស្ស៊ីបានទម្លាក់គ្រាប់បែក ជាង៣ ០០០គ្រាប់ បញ្ជូនដ្រូនមកវាយប្រហារចំនួន៦០០គ្រឿង និងបាញ់មីស៊ីល៤០០គ្រាប់ វាយប្រហារប្រទេសអ៊ុយក្រែន ត្រឹមមួយខែមីនា។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្សេលេនស្គី និយាយថា ក្នុងរយៈពេលពីរសប្តាហ៍ចុងក្រោយនេះ រុស្ស៊ីបានបង្កើនយុទ្ធនាការវាយប្រហារតាមអាកាសរយៈចម្ងាយឆ្ងាយរបស់ខ្លួន មកលើហេដ្ឋារចនាសម្ព័ន្ធថាមពលអ៊ុយក្រែន ដោយបន្ថែមទម្ងន់លើការខូចខាតដែលបង្កឡើងដោយទីក្រុងមូស្គូរួចទៅហើយ ក្នុងការវាយលុកទ្រង់ទ្រាយធំអាយុកាល២៥ខែ។

មិនត្រឹមប៉ុណ្ណឹង រុស្ស៊ីក៏​​បង្កើនការទម្លាក់គ្រាប់​បែកលើ​តំបន់​ជួរ​មុខផងដែរ ​ក្នុង​រយៈពេល​ប៉ុន្មាន​ខែ​ថ្មីៗ​នេះ។

ការអះអាងរបស់លោក ហ្សេលេនស្គី ធ្វើឡើងស្របពេលដែល រដ្ឋមន្ត្រីការពារជាតិរុស្ស៊ីលោក Sergey Shoigu បញ្ជាក់ថា អ៊ុយក្រែន ស្លាប់ទាហានជាង ៨០ ០០០នាក់ ចាប់តាំងពីដើមឆ្នាំនេះមក។

លើសពីនេះ គ្រឿងសឹកជាង ១៤ ០០០ ក៏ត្រូវបានបំផ្លាញដោយកងកម្លាំងរុស្ស៊ីផងដែរ ចាប់តាំងពីខែមករា ដោយក្នុងនោះរួមមានរថក្រោះ ១ ២០០ គ្រឿង និងរថពាសដែកប្រយុទ្ធផ្សេងទៀត ហើយទីក្រុង​មូស្គូ​ ថែមវាយយកបាន​ផ្ទៃដី​ប្រមាណ ៤០៣ គីឡូម៉ែត្រ​ការ៉េ​ទៀតផង។

រម្លឹកទៅកាលពីខែមុន ក្រសួងការពារជាតិរុស្ស៊ីបានរាយការណ៍ថា អ៊ុយក្រែន ត្រូវបាត់បង់ទាហានសរុប ៤៤៤ ០០០នាក់ ចាប់តាំងពីការផ្ទុះឡើងនៃជម្លោះនៅខែកុម្ភៈឆ្នាំ២០២២ ហើយក្នុងនោះបូករួមទាំងទាហាន ១៦៦ ០០០នាក់ ដែលក្ស័យជីវិតក្នុងអំឡុងពេលនៃ ការវាយលុកបរាជ័យនៅរដូវក្តៅឆ្នាំមុនផងដែរ។

ទោះបីជាយ៉ាងណាក៏ដោយ ប្រធានាធិបតីអ៊ុយក្រែន បដិសេធថា ទាហានរបស់ខ្លួនត្រឹម ៣១ ០០០នាក់ប៉ុណ្ណោះ ដែលបានពលីចាប់តាំងពីជម្លោះផ្ទុះឡើង៕

អត្ថបទ៖ សុខ សុវណ្ណ

ចុចអាន៖ រុស្ស៊ី ដាក់លក្ខខណ្ឌ ចរចាសន្តិភាពជាមួយ អ៊ុយក្រែន