ព័ត៌មានអន្ដរជាតិ

របបសឹកមីយ៉ាន់ម៉ា ហាមប្រុសៗចេញទៅធ្វើការក្រៅប្រទេស

បានផុស

២ years មុន

នៅ

ថ្ងៃសៅរ៍ ៤ ឧសភា ២០២៤

ដោយ

Chheang

របបសឹកមីយ៉ាន់ម៉ា បានប្រកាសផ្អាកការចេញលិខិតច្បាប់អនុញ្ញាតឲ្យបុរសជនជាតិមីយ៉ាន់ម៉ាទៅបម្រើការងារនៅបរទេស។ សេចក្ដីប្រកាសនេះ ធ្វើឡើងត្រឹមប៉ុន្មានសប្ដាហ៍ក្រោយច្បាប់កាតព្វកិច្ចយោធាត្រូវបានយកមកអនុវត្ត ហើយមានប្រជាពលរដ្ឋរាប់ម៉ឺននាក់បានព្យាយាមគេចចាកចេញទៅក្រៅប្រទេស។

ពលរដ្ឋមីយ៉ាន់ម៉ា ឈរតម្រង់ជួរមុខស្ថានទូតបរទេស នៅក្រុងយ៉ាំងហ្គោន (រូបថត៖ Getty Image)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីខែកុម្ភៈកន្លងទៅ មីយ៉ាន់ម៉ា បានប្រកាសឲ្យបុរសៗពេញវ័យទាំងអស់ត្រូវចូលបម្រើយោធាយ៉ាងហោចណាស់ក៏២ឆ្នាំដែរ។ ចំណាត់ការនេះ បានធ្វើឲ្យមនុស្សជាច្រើនម៉ឺននាក់សម្រុកនាំគ្នាទៅធ្វើទិដ្ឋាការទៅក្រៅប្រទេស ហើយពលរដ្ឋមីយ៉ាន់ម៉ាមួយចំនួនបានលួចរត់ឆ្លងដែនចូលក្នុងប្រទេសថៃ។

ក្រសួងការងារមីយ៉ាន់ម៉ា បានចេញសេចក្ដីប្រកាសនេះ កាលពីរសៀលថ្ងៃទី២ ខែឧសភា ស្របពេលដែលរបបសឹកកំពុងតទល់ជាមួយក្រុមបះបោរប្រឆាំងនៅពាសពេញផ្ទៃប្រទេស។

គួររំឭកថា ច្បាប់កាតព្វកិច្ចយោធានៅមីយ៉ាន់ម៉ា ត្រូវបានបង្កើតឡើងតាំងតែងពីរបបសឹកលើកមុន កាលពីឆ្នាំ២០១០ ប៉ុន្តែមិនទាន់ត្រូវបានអនុវត្តនោះឡើយ។ ច្បាប់នេះ អនុញ្ញាតឲ្យយោធាអាចកោះហៅបុរសៗដែលមានអាយុចាប់ពី១៨ ដល់ ៣៥ឆ្នាំ ហើយនិងនារីអាយុ ១៨ ដល់ ២៧ឆ្នាំ ចូលបម្រើជួរទ័ពយ៉ាងហោចណាស់ចំនួន ២ឆ្នាំ។ ច្បាប់នេះទៀតសោត មានបញ្ញត្តិមួយ ដែលចែងថា ក្នុងលក្ខខណ្ឌអាសន្ន ការចូលបម្រើយោធាអាចត្រូវបន្ថែមរហូតដល់ ៥ឆ្នាំ ហើយជនណាដែលគេចវេសនឹងត្រូវជាប់ពន្ធនាគារនៅក្នុងរយៈពេលដូចគ្នា។

អ្នកនាំពាក្យរបបសឹកមីយ៉ាន់ម៉ា បានប្រាប់ថា មានពលរដ្ឋប្រមាណ ១៣លាននាក់ ស្ថិតនៅក្នុងវ័យ ដែលអាចចូលបំពេញកាតព្វកិច្ចយោធាបាន តែខាងយោធារដ្ឋាភិបាលមានសមត្ថភាពអាចហ្វឹកហ្វឺនត្រឹម ៥ម៉ឺននាក់ក្នុង១ឆ្នាំប៉ុណ្ណោះ៕

ដោយ៖ ឈាង

Related Topics:ប្រទេសមីយ៉ាន់ម៉ា