CEO ក្រុមហ៊ុនឱសថ Pfizer ថា មហារីកជាជំងឺកូវីដថ្មីរបស់ពិភពលោក

បច្ចុប្បន្នជំងឺមហារីកបានក្លាយខ្លួនទៅជាមេរោគកូវីដថ្មី បន្ទាប់ពីការព្យាបាលជំងឺមួយនេះកំពុងមានទីផ្សារ ខណៈរោគរាតត្បាតកូវីដ ១៩ ហាក់សាបរលាប ស្របពេលដែលតម្រូវការវ៉ាក់សាំង និងថ្នាំគ្រាប់ព្យាបាលជំងឺកូវីដលើសកលលោកក៏ធ្លាក់ចុះជាលំដាប់ ។ នេះបើយោងតាមការលើកឡើងពីសំណាក់ CEO ក្រុមហ៊ុនផលិតឱសថអាមេរិក Pfizer លោក Albert Bourla និងចុះផ្សាយដោយសារព័ត៌មាន RT កាលពីថ្ងៃទី៦ ខែឧសភាកន្លងទៅ ។

CEO របស់ក្រុមហ៊ុន Pfizer រូបនេះបានលើកឡើងថា “មហារីកកំពុងប្រែមុខមាត់ជាជំងឺកូវីដថ្មី ដូច្នេះវាក៏ជាបញ្ហាមួយទៀតសម្រាប់យើងក្នុងការរិះរកការផលិតវ៉ាក់សាំង និងថ្នាំគ្រាប់សម្រាប់ការព្យាបាលជំងឺមួយនេះ ដោយសារតែយើងធ្លាប់ជោគជ័យជួយសង្គ្រោះពិភពលោកពីកូវីដម្ដងរួចទៅហើយ ហើយក្រុមហ៊ុនក៏ធ្លាប់បានប្រកាសពីចិត្តគំនិតឆ្ពោះទៅរកការព្យាបាលជំងឺមហារីកតាំងតែពីចុងឆ្នាំ ២០២៣ មកម្ល៉េះផងដែរ” ។

លោក Bourla បញ្ជាក់ទៀតថា បច្ចុប្បន្នេះ គ្មានអ្វីធ្វើឲ្យមនុស្សទូទាំងពិភពលោកភ័យខ្លាចជាងជំងឺមហារីកនោះទេ ហើយបើវាផ្ទុះរាលដាលខ្លាំងឡើងៗមែននោះវានឹងប៉ះពាល់ដល់មនុស្សគ្រប់គ្នា ។ ខ្ញុំសង្ឃឹមថា យើងនឹងទទួលបានជោគជ័យក្នុងបេសកកម្មផលិតឱសថព្យាបាលជំងឺមួយនេះ ហើយខ្ញុំ​មាន​សុទិដ្ឋិនិយម​ថា ​រយៈពេល​ ១០ ​ឆ្នាំ​ខាង​មុខ យើង​នឹងមើល​ឃើញ​មានការ​វិវត្តគួរឲ្យ​កត់​សម្គាល់ពីប្រសិទ្ធភាពនៃឱសថមួយនេះ” ។

ជាក់ស្ដែងក្រុមហ៊ុន Pfizer កំពុងប្រែចិត្តលែងចង់ផលិតវ៉ាក់សាំង ក៏ដូចជាថ្នាំគ្រាប់ព្យាបាលកូវីដទៅហើយ ហើយងាកទៅរកការបង្កើនប្រសិទ្ធភាពនៃការផលិតវ៉ាក់សាំង ក៏ដូចជាថ្នាំគ្រាប់ព្យាបាលជំងឺមហារីក បើទោះបីជារោគរាតត្បាតកូវីដ ១៩ ជួយឲ្យក្រុមហ៊ុនឱសថយក្សអាមេរិកមួយនេះកើបប្រាក់ចំណូលបានយ៉ាងសម្បើមក៏ដោយ ។

នៅចុងឆ្នាំ ២០២៣ ក្រុមហ៊ុន Pfizer បានជះលុយ ៤៣ ពាន់លានដុល្លារក្នុងការទិញយកក្រុមហ៊ុន Seagen ជាក្រុមហ៊ុនដែលមានជំនាញឯកទេសលើការផលិតថ្នាំ Adcetris ដើម្បីព្យាបាលជំងឺមហារីកកូនកណ្តុរ និងជំងឺមហារីក Hodgkin ដែលជាមហារីក​ទាំងទង​នឹង​កោសិកា​ឈាម​ស ហើយបើយោងតាមគេហទំព័រ drug.com បានចុះផ្សាយថា ថ្នាំនេះមានតម្លៃជិត ១២ ដុល្លារសម្រាប់កម្រិត ៥០ មិល្លីក្រាម ។

ចំណែកថ្នាំមួយប្រភេទទៀតដែលកំពុងមាននៅក្នុងដៃក្រុមហ៊ុន Pfizer ហើយរំពឹងនឹងអាចព្យាបាលជំងឺមហារីកបានដែរនោះគឺមានឈ្មោះ Padcev ។ ថ្នាំនេះត្រូវបានក្រុមហ៊ុនប្រើដើម្បីព្យាបាលជំងឺមហារីកប្លោកនោម ហើយចាប់តាំងពីវាបង្ហាញប្រសិទ្ធភាពដ៏គួរឲ្យភ្ញាក់ផ្អើលរួចមក ថ្នាំនេះលក់ដាច់រហូតដល់ ១៦៤ ភាគរយឯណោះ បើទោះបីជាវាមានតម្លៃ ៤,៤៤៦ ដុល្លារសម្រាប់កម្រិត ៣០ មិល្លីក្រាមក៏ដោយ ។

គួរបញ្ជាក់ថា កាលពីខែមករា ឆ្នាំ២០២៤ ក្រុមហ៊ុម Pfizer បានប្រកាសគម្រោងផលិតថ្នាំព្យាបាលជំងឺមហារីកយ៉ាងតិច ៨ ប្រភេទនៅត្រឹមឆ្នាំ ២០៣០ ខណៈគ្រាន់តែក្នុងឆ្នាំ ២០២២ ក្រុមហ៊ុនឱសថយក្សអាមេរិកមួយនេះកើបចំណូលបានពីការលក់សរុបមានទំហំទៅដល់ ១៥៧ ពាន់លានដុល្លារឯណោះ ក្នុងនោះវ៉ាក់សាំងចាក់ការពារកូវីដរកបាន ៣៧.៨ ពាន់លានដុល្លារ ឯថ្នាំគ្រាប់ព្យាបាលកូវីដឈ្មោះ Paxlovid ទទួលបាន ១៨.៩ ពាន់លានដុល្លារ ៕

ដោយ ៖ សុខ ជីវ័ន្ត

ចុចអាន ៖ ប្រធានាធិបតី ចិន ហោះទៅដល់ បារាំង ត្រៀមពិភាក្សារឿងក្ដៅៗលើពិភព លោកជាមួយលោក ម៉ាក្រុង