លោក ពូទីន នឹងយកសុខសុវត្ថិភាពប្រជាជនជាចម្បងក្នុងអាណត្តិថ្មី

ថ្លែងនៅក្នុងសុន្ទរកថាជាលើកដំបូងក្នុងអាណត្តិថ្មី លោកប្រធានាធិបតីរុស្ស៊ី វ្ល៉ាឌីមៀរ ពូទីន បានគូសបញ្ជាក់ ក៏ដូចជាសង្កត់ធ្ងន់ជាចម្បងទៅលើសន្តិសុខ និងសុខសុវត្ថិភាពរបស់ប្រជាជនរុស្ស៊ី ។ នេះបើយោងតាមសេចក្ដីរាយការណ៍របស់ទូរទស្សន៍ជាតិជប៉ុន NHK កាលពីថ្ងៃទី៧ ខែ​ឧសភាកន្លងទៅ ។

លោក ពូទីន បានថ្លែងគូសបញ្ជាក់នេះនៅក្នុងពិធីស្បថចូលកាន់តំណែងជាប្រធានាធិបតីអាណត្តិទី ៥ នៅវិមានក្រឹមឡាំងកាលពីថ្ងៃអង្គារ ក្នុងនោះលោកបានសង្កត់ធ្ងន់ថា សន្តិសុខជាតិ និងស្ថិរភាពនយោបាយនឹងក្លាយជាអាទិភាពចម្បងរបស់លោកនៅក្នុងអាណត្តិថ្មីនេះ ហើយលោកក៏បានថ្លែងអំណរគុណដល់កម្លាំងយោធាដែលចូលរួមក្នុងប្រតិបត្តិការសឹករបស់រុស្ស៊ីទៅលើអ៊ុយក្រែនផងដែរ ។

មួយវិញទៀត លោក ពូទីន ក៏បានបញ្ជាក់ដែរថា រុស្ស៊ីបានត្រៀមខ្លួនរួចជាស្រេចក្នុងការសន្ទនាជាមួយបណ្តាប្រទេសលោកខាងលិចស្តីពីសន្តិសុខ និងស្ថិរភាពជាយុទ្ធសាស្ត្រ ខណៈដែលទីក្រុងមូស្គូ និងបណ្ដាប្រទេសលោកខាងលិចមើលមុខគ្នាលែងត្រូវ ដោយសារតែភ្លើងសង្គ្រាមទៅលើអ៊ុយក្រែន ប៉ុន្តែលោកក៏បានស្នើឲ្យភាគីនានាមានការគោរពផលប្រយោជន៍គ្នាទៅវិញទៅមកផងដែរ ។

គួរបញ្ជាក់ថា លោក ពូទីន ដែលមានវ័យ ៧១ ឆ្នាំបានកាន់​អំណាច​ជា​ប្រធានាធិបតីអស់​រយៈពេល​ជាង ២០ ​ឆ្នាំ​មក​ហើយ ចាប់​តាំង​ពី​ឡើង​កាន់​តំណែង​​ជា​លើក​ដំបូង​ក្នុង​ឆ្នាំ ២០០០ ៕

អត្ថបទ ៖ ប៊ុន សុភាព