Breaking News! ប្រធានាធិបតី អ៊ីរ៉ង់ ស្លាប់បាត់បង់ជីវិតក្នុងហេតុការណ៍ធ្លាក់ឧទ្ធម្ភាគចក្រ

ទីភ្នាក់ងារព័ត៌មានរដ្ឋអ៊ីរ៉ង់ចំនួន ២ ដូចជា IRINN និង Mehr News បានរាយការណ៍ដូចៗគ្នានៅថ្ងៃទី២០ ខែឧសភានេះថា លោកប្រធានាធិបតី Ebrahim Raisi រួមជាមួយមន្ត្រីអ្នកមុខអ្នកការផ្សេងទៀតដែលរួមដំណើរជាមួយលោកគឺបានទទួលមរណភាពហើយ ក្រោយហេតុការណ៍ធ្លាក់ឧទ្ធម្ភាគចក្រកាលពីថ្ងៃអាទិត្យ ។

ចំណែកសារព័ត៌មាន CNN បានបញ្ជាក់ថា លោក Raisi ត្រូវបានអមដំណើរដោយលោករដ្ឋមន្ត្រីការបរទេស Hossein Amirabdollahian, អភិបាលខេត្ត East Azerbaijan លោក Malek Rahmati, តំណាងរបស់មេដឹកនាំកំពូលអ៊ីរ៉ង់លោក Ayatollah Mohammad Ali Ale-Hashem អំឡុងពេលចុះទៅតំបន់ព្រំដែន ។

ហេតុការណ៍ដ៏សោកសង្រេងនេះកើតមានឡើង នៅពេលដែលលោក Raisi អញ្ជើញហោះវិលត្រឡប់ពីដំណើរចុះទៅពិនិត្យមើលតំបន់ព្រំដែនជាមួយអាស៊ែបៃហ្សង់ នៅភាគពាយព្យប្រទេសអ៊ីរ៉ង់ ខណៈឧទ្ធម្ភាគចក្រដែលមេដឹកនាំអ៊ីរ៉ង់រូបនេះជិះគឺជាប្រភេទ Bell 212 ផលិតដោយសហរដ្ឋអាមេរិក ហើយដោយសារតែបញ្ហាអាកាសធាតុ ទើបបណ្តាលឲ្យក្រុមជួយសង្គ្រោះពិបាកធ្វើការ ដើម្បីទៅឲ្យដល់ទីតាំងធ្លាក់ ។

ទោះយ៉ាងណា យោងតាមប្រធានអឌ្ឍចន្ទក្រហមអ៊ីរ៉ង់លោក Pir-Hossein Kolivand បានប្រាប់សារព័ត៌មាន Tasnim ថា យ៉ាងហោចណាស់ក្រុមអ្នកជួយសង្គ្រោះចំនួន ៧៣ នាក់កំពុងស្ថិតនៅក្នុងតំបន់នៃការធ្លាក់ឧទ្ធម្ភាគចក្រនៅជិតភូមិ Tavil ក្នុងខេត្ត East Azerbaijan របស់ប្រទេសអ៊ីរ៉ង់ ហើយពេលនេះពួកគេបានរកឃើញឧទ្ធម្ភាគចក្ររបស់លោក Raisi ហើយ និងបានបញ្ជាក់ទៀតថា អ្នកដំណើរនៅលើយន្តហោះគឺស្លាប់បាត់បង់ជីវិតទាំងអស់ ។

គួរបញ្ជាក់ថា លោក Raisi វ័យ ៦៣ ឆ្នាំបានជាប់ឆ្នោតជាប្រធានាធិបតីអ៊ីរ៉ង់ក្នុងឆ្នាំ ២០២១ ហើយចាប់តាំងពីឡើងកាន់តំណែងមក លោកបានបញ្ជាឲ្យរឹតបន្តឹងច្បាប់សីលធម៌ បើកការបង្រ្កាបបង្ហូរឈាមលើបាតុកម្មប្រឆាំងរដ្ឋាភិបាល និងថែមទាំងជំរុញឲ្យមានកិច្ចចរចានុយក្លេអ៊ែរជាមួយមហាអំណាចពិភពលោកថែមទៀតផង ៕

ដោយ ៖ សុខ ជីវ័ន្ត

ចុចអាន ៖ ប្រធានាធិបតី អ៊ីរ៉ង់ និងរដ្ឋមន្ត្រីការបរទេស ធ្លាក់ឧទ្ធម្ភាគចក្រជាមួយគ្នា មិនទាន់ដឹងជោគវាសនាបែបណា