សន្តិភាពតែលើ​​​ក្រដាស! អ៊ីស្រាអែល ដើរផ្ទុយ​ពីកិច្ចព្រមព្រៀង បន្ត​វាយ​ប្រហារ​លីបង់ ស្លាប់មនុស្ស​១៦នាក់ទៀត

រាត្រីដ៏ស្ងប់ស្ងាត់របស់ប្រជាពលរដ្ឋនៅក្នុងទីក្រុង Nabatieh និងទីប្រជុំជននានានៅភាគខាងត្បូងនៃប្រទេសលីបង់ បានក្លាយទៅជាវាលពិឃាតមួយរំពេច កាលពីព្រលឹមស្រាងៗថ្ងៃសុក្រនេះ។ គ្រាប់បែក និងគ្រាប់កាំភ្លើងធំរបស់អ៊ីស្រាអែល បានធ្លាក់លាន់ឮ​ដូចរន្ទះ ចំផ្ទះសម្បែងដែលមនុស្សម្នាកំពុងដេកលង់លក់ បណ្តាលឱ្យជីវិត​យ៉ាងហោចណាស់ ១៦នាក់ត្រូវបាត់បង់​ភ្លាមៗ ក្រោមគំនរបាក់បែក និងជាច្រើននាក់ទៀតរងរបួសស្រែកថ្ងូរគួរឱ្យវេទនា។

សោកនាដកម្មនេះ បានកើតឡើងទាំងបំពាន បើទោះបីជាពិភពលោក ទើបតែអបអរសាទរចំពោះកិច្ចព្រមព្រៀងសន្តិភាពថ្មីរវាងអាមេរិក និងអ៊ីរ៉ង់ ដែលសន្យាថានឹងបញ្ឈប់ការវាយប្រហារលើលីបង់ផង​ដែរ​ក៏ដោយ។

យោងតាមសេចក្ដី​រាយការណ៍​ពី​​ភ្នាក់ងារសារព័ត៌មានជាតិលីបង់ ដែល​ត្រូវ​យកទៅ​ចុះផ្សាយ​បន្ត​ដោយ​​សារព័ត៌មាន Anadolu នា​ថ្ងៃទី​១៩ ខែមិថុនា ឆ្នាំ​២០២៦ នេះ សំឡេងផ្ទុះអាវុធ បានអង្រួនទាំង​មេឃមិនទាន់ភ្លឺ តាំងពី​ពាក់កណ្តាលអធ្រាត្រមក​ម៉្លេះ។ នៅ​ម៉ោង២រំលង​អាធ្រាត្រ យន្តហោះចម្បាំងអ៊ីស្រាអែល បានបើកការវាយប្រហារផ្លូវអាកាសយ៉ាងសាហាវព្រៃផ្សៃ ចំតំបន់សាកលវិទ្យាល័យ និងប្លុក​អគារស្នាក់នៅ ដោយក្នុងនោះ មនុស្ស ៨នាក់បានស្លាប់មួយរំពេច។ មិនទាន់អស់ចិត្ត គ្រាប់បែក បានបន្តធ្លាក់កម្ទេច​ផ្ទះមួយខ្នងនៅតំបន់ជិតនោះ សម្លាប់មនុស្ស ៧នាក់បន្ថែមទៀតទាំងមិនដឹងខ្លួន។ លុះព្រះអាទិត្យជិតរះ ខ្ទង់​ម៉ោង៥ភ្លឺ ដ្រូន​របស់អ៊ីស្រាអែល បានហោះ​ក្រឡឹង និងបានបាញ់ប្រហារចំម៉ូតូមួយគ្រឿងនៅជិតអគារសាលាក្រុង Doueir បណ្តាលឱ្យមនុស្សម្នាក់ទៀត​បាត់បង់ជីវិតយ៉ាងអាណោចអាធ័ម។

ការវាយប្រហារមិនរើសមុខនេះ បានកើតឡើង បន្ទាប់ពីប្រធានាធិបតីអាមេរិក លោក ដូណាល់ ត្រាំ និងប្រធានាធិបតីអ៊ីរ៉ង់ លោក Masoud Pezeshkian ទើបតែបានចុះហត្ថលេខាលើកិច្ចព្រមព្រៀងជាប្រវត្តិសាស្ត្រមួយ កាលពីល្ងាចថ្ងៃពុធ ដើម្បីបញ្ចប់សង្គ្រាម និងទុកពេល ៦០ថ្ងៃ សម្រាប់ចរចារកសន្តិភាពយូរអង្វែង។ ប៉ុន្តែ សកម្មភាពជាក់ស្តែងរបស់អ៊ីស្រាអែល នៅពេលនេះ បានបង្ហាញឱ្យឃើញថា ពួកគេមិនរវីរវល់នឹងបទឈប់បាញ់នោះឡើយ។ គិតចាប់តាំងពីអ៊ីស្រាអែល បានបើកការវាយលុកទ្រង់ទ្រាយធំលើលីបង់ កាលពីដើមខែមីនាមក ប្រជាជនលីបង់ជិត ៤ ០០០នាក់បានស្លាប់ ជាង ១ម៉ឺននាក់រងរបួស និងជាង ១លាននាក់ត្រូវបោះបង់ចោលផ្ទះសម្បែងរត់ភៀសខ្លួន ស្រប​ពេល​ដែល​កងទ័ពអ៊ីស្រាអែល បានវាយលុកចូលជ្រៅក្នុងទឹកដីលីបង់ជាង ១០គីឡូម៉ែត្រ​ទៅហើយ៕

ប្រែសម្រួល៖ ឈាង