ចិន ចាប់ខ្លួនបុរសម្នាក់ ដែលរត់ពន្ធ​ពស់​រស់ ជាង​​១០០​ក្បាល លាក់ក្នុង​ខោ

យោងតាមការចេញផ្សាយរបស់សារព័ត៌មាន CNA នៅថ្ងៃទី១១ខែកក្កដា, បុរស​ម្នាក់​ត្រូវ​បាន​ចាប់​ខ្លួន​ ពីបទ​ព្យាយាម​រត់​ពន្ធ​សត្វពស់​រស់​ជាង ១០០ក្បាលលាក់ក្នុងខោរបស់គាត់ ជាមួយគោលបំណងយក​ចូល​ទៅ​ក្នុង​ចិន​ដី​គោក ។

យោងតាមគយចិនបានឲ្យដឹងថា អ្នកដំណើរដែលគេបញ្ចេញឈ្មោះរូបនេះ ត្រូវបានមន្រ្តីគយចាប់ខ្លួន ខណៈគាត់ព្យាយាមធ្វើដំណើរពីទីក្រុងហុងកុង ចូលទៅក្នុងទីក្រុង Shenzhen ដោយអំឡុងពេលនោះ មន្រ្តីគយ​រក​ឃើញ​ថា ហោប៉ៅ​ខោ​ដែល​អ្នក​ដំណើរ​ស្លៀក​នោះ ​មាន​ថង់​ចំនួន​ប្រាំមួយដោយក្នុងថង់​នីមួយៗមាន​សត្វពស់​រស់​ច្រើនប្រភេទ គ្រប់ទំហំ និង​ពណ៌ខុសៗគ្នា។ សត្វពស់ត្រូវបានរឹបអូសមានចំនួន១០៤ ក្បាលភាគច្រើនជាប្រភេទសត្វក្នុងស្រុក។

ប្រទេសចិន គឺជាមជ្ឈមណ្ឌលជួញដូរសត្វដ៏ធំបំផុតមួយរបស់ពិភពលោក ប៉ុន្តែអាជ្ញាធរបានបង្ក្រាបការជួញដូរខុសច្បាប់ក្នុងកម្រិតដ៏ខ្ពស់ នារយៈពេលប៉ុន្មានឆ្នាំចុងក្រោយនេះ។ កាលពីឆ្នាំ ២០២៣ នៅច្រកដដែលនេះ ក៏មានករណីស្រដៀងគ្នានេះដែរ ដោយស្ត្រីម្នាក់ត្រូវបានចាប់ខ្លួន បន្ទាប់បានរកឃើញថាបានព្យាយាមរត់ពន្ធពស់ចំនួន ៥ ក្បាលលាក់ក្នុងអាវទ្រនាប់របស់នាង៕

អត្ថបទ៖ ប៊ុន សុភាព