អ៊ីរ៉ង់ រុស្ស៊ី ចិន នឹងធ្វើសមយុទ្ធយោធារួមគ្នាចាប់​ពីថ្ងៃអង្គារ​ក្នុងដែន​សមុទ្រ​អ៊ីរ៉ង់​

កងទ័ពជើងទឹកនៃប្រទេសអ៊ីរ៉ង់ រុស្ស៊ី និងចិន នឹងធ្វើសមយុទ្ធរួមគ្នានៅឆ្នេរសមុទ្រអ៊ីរ៉ង់ក្នុងសប្តាហ៍នេះ ក្នុងគោលបំណងជំរុញកិច្ចសហប្រតិបត្តិការ​​ក្នុង​វិស័យ​យោធា​​​​​ឲ្យ​កាន់តែ​​រឹងមាំ​​និង​ស៊ីជម្រៅ​​ជាមួយគ្នា។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១០ខែមីនានេះ។

ប្រទេសទាំង​បី​នេះ​​ មានបំណងប្រាថ្នា​គ្រោងធ្វើសមយុទ្ធរួមគ្នា ដើម្បីប្រឆាំងនឹងការពង្រីកឧត្តមភាពរបស់អាមេរិកដែលបាន​ធ្វើសមយុទ្ធស្រដៀងគ្នានៅក្នុងតំបន់ក្នុងប៉ុន្មានឆ្នាំថ្មីៗនេះ។

ទីភ្នាក់ងារសារព័ត៌មាន Tasnim របស់អ៊ីរ៉ង់ បានឲ្យដឹងថា សមយុទ្ធ«Security Belt-2025» នឹងចាប់ផ្តើមនៅថ្ងៃអង្គារ​សប្ដាហ៍នេះ នៅក្នុងកំពង់ផែ Chabahar ដែលមានទីតាំងនៅភាគអាគ្នេយ៍ប្រទេសអ៊ីរ៉ង់ នៅលើឈូងសមុទ្រអូម៉ង់ ដោយមិនបានបញ្ជាក់អំពីរយៈពេល​​នៃ​លំហាត់​សមយុទ្ធ​រួម​គ្នា​​នោះទេ។

សមយុទ្ធនេះនឹងមានការចូលរួមពីនាវាកងកម្លាំងជើងទឹកចិន និងរុស្ស៊ី ក៏ដូចជា នាវាចម្បាំងនៃកងនាវាចររបស់កងទ័ពជើង​ទឹក និងឆ្មាំបដិវត្តន៍ ដែលជាកងកម្លាំងដ៍សំខាន់នៃយោធាអ៊ីរ៉ង់។ សមយុទ្ធនេះនឹងប្រព្រឹត្តទៅនៅភាគខាងជើងមហាសមុទ្រ​ឥណ្ឌា។

ផែនការសមយុទ្ធនេះ រួមមានសមយុទ្ធលើគោលដៅនាវាចរណ៍ ការគ្រប់គ្រងការខូចខាត ក៏ដូចជាការស្វែងរក និង​ជួយ​សង្គ្រោះ​រួមគ្នា និងមានគោលបំណងគឺដើម្បីពង្រឹងទំនុកចិត្តគ្នាទៅវិញទៅមកខាងយោធា និងជំរុញកិច្ចសហប្រតិបត្តិការជាក់ស្តែងក្នុងចំណោមកងកម្លាំងជើងទឹកនៃប្រទេសដែលចូលរួមទាំងបី។

ជាមួយគ្នានេះប្រទេសអាស៊ែបៃហ្សង់ អាហ្រ្វិកខាងត្បូង អូម៉ង់ កាហ្សាក់ស្ថាន ប៉ាគីស្ថាន កាតា អ៊ីរ៉ាក់ អារ៉ាប់រួម និងស្រីលង្កា នឹងចូលរួមជាអ្នកសង្កេតការណ៍៕

អត្ថបទ៖ ប៊ុន សុភាព