ព័ត៌មានអន្ដរជាតិ

តុលាការចិនលុបចោលទោសប្រហារជីវិត លើបុរសកាណាដាម្នាក់ បន្ទាប់ពីរឿងក្តីនេះតានតឹងច្រើនឆ្នាំ

បានផុស

៥ ខែ មុន

នៅ

ថ្ងៃចន្ទ ៩ កុម្ភៈ ២០២៦

ដោយ

តុលាការកំពូលរបស់ប្រទេសចិនបានលុបចោល ការកាត់ទោសប្រហារជីវិតលើបុរសជនជាតិកាណាដាម្នាក់ ពីបទរត់ពន្ធគ្រឿងញៀន កាលពីថ្ងៃចន្ទ។ រឿងក្តីនេះ បានធ្វើឱ្យទំនាក់ទំនងការទូតរវាងទីក្រុង អ៊តាវ៉ា(Ottawa) និងទីក្រុងប៉េកាំងមានភាពតានតឹងអស់ជាច្រើនឆ្នាំ។

អ្នកនាំពាក្យក្រសួងការបរទេសចិន លោក Lin Jian ។ រូបភាព៖ ក្រសួងការបរទេសចិន!

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរ៉យទ័រ នៅថ្ងៃទី៩ ខែកុម្ភៈ លោក Robert Schellenberg ត្រូវបានចាប់ខ្លួន ក្នុងប្រទេសចិនក្នុងឆ្នាំ ២០១៤ពីបទសង្ស័យរត់ពន្ធគ្រឿងញៀន ហើយកាត់ទោសក្នុងឆ្នាំ ២០១៨ ជាលើកដំបូងឱ្យជាប់គុក ១៥ ឆ្នាំ។ ជាពិសេសត្រូវកាត់ទោសប្រហារជីវិតជាបន្តបន្ទាប់ នៅខែមករា ឆ្នាំ ២០១៩ ពោលគឺមួយខែបន្ទាប់ពីនាយកប្រតិបត្តិក្រុមហ៊ុន Huawei លោក Meng Wanzhou ត្រូវបានចាប់ខ្លួននៅទីក្រុង Vancouver តាមដីការបស់សហរដ្ឋអាមេរិក។

មេធាវីមូលដ្ឋាននៅទីក្រុងប៉េកាំង លោក Zhang Dongshuo បានប្រាប់រ៉យទ័រថា តុលាការប្រជាជនកំពូលរបស់ប្រទេសចិន កាលពីថ្ងៃសុក្រ បានកាត់ក្តីប្រឆាំងនឹងការកាត់ទោសប្រហារជីវិត និងអនុម័តដោយតុលាការជាន់ទាប។

លោកបានបន្តថា សំណុំរឿងនេះនឹងត្រូវបញ្ជូនទៅតុលាការប្រជាជននៅខេត្ត Liaoning ដើម្បីធ្វើជំនុំជម្រះឡើងវិញ។

ការធ្វើឡើងនេះ កើតឡើងតិចជាងមួយខែបន្ទាប់ពីនាយករដ្ឋមន្រ្តីកាណាដា លោក Mark Carney បានធ្វើទស្សនកិច្ចរយៈពេលបួនថ្ងៃ មកកាន់ប្រទេសចិន។ ជាកន្លែងដែលខ្លួនអបអរ ចំពោះភាពប្រសើរឡើងវិញនៃទំនាក់ទំនងរបស់ប្រទេសទាំងពីរ បន្ទាប់ពីមានភាពជូរចត់នៅក្រោមការដឹកនាំមុនរបស់កាណាដា លោក Justin Trudeau។

ចំណែកអ្នកនាំពាក្យក្រសួងការបរទេសកាណាដា បានប្រាប់រ៉យទ័រថា ពួកគេដឹងពីសេចក្តីសម្រេចរបស់តុលាការកំពូលរួចហើយ។ លើសពីនេះ នឹងបន្តផ្តល់សេវាផ្លូវច្បាប់ដល់ លោក Schellenberg និងគ្រួសាររបស់គេ។ តែលោកមិនបានបញ្ជាក់លម្អិតពីការសម្រេចចិត្តនេះនៅឡើយទេ។

លោកបានបន្តថា៖ « តាមការវិនិច្ឆ័យពីសុន្ទរកថាផ្លូវការរបស់ប្រទេសទាំងពីរ មានលទ្ធភាពល្អច្រើននៃការសម្រេចចិត្តរបស់តុលាការកំពូល។ បន្ទាប់ពីនាយករដ្ឋមន្ត្រីកាណាដាបានធ្វើទស្សនកិច្ចមកកាន់ប្រទេសចិន នេះបើយោងតាមបទពិសោធន៍របស់ខ្ញុំ»។

ចំណែកអ្នកនាំពាក្យក្រសួងការបរទេសចិន លោក Lin Jian បានថ្លែងអំឡុងសន្និសីទខ្លីមួយកាលពីថ្ងៃចន្ទ ពីករណីរបស់ លោក Schellenberg ថា៖ «ស្ថាប័នតុលាការរបស់ចិនបានស្តាប់ដោយឯករាជ្យ នូវករណីពាក់ព័ន្ធ និងបានចេញសាលក្រមស្របតាមផ្លូវច្បាប់»៕

ប្រែសម្រួល៖ ណឺ មិនា