ព័ត៌មានអន្ដរជាតិ

ក្រោយរួចផុតពីចង្កូមមច្ចុរាជ លោក ត្រាំ កើនទ្រព្យសម្បត្តិបានជាង ១ពាន់លានដុល្លារ

បានផុស

២ years មុន

នៅ

ថ្ងៃពុធ ១៧ កក្កដា ២០២៤

ដោយ

Chheang

ទ្រព្យសម្បត្តិរបស់លោក ដូណាល់ ត្រាំ បានកើនឡើងយ៉ាងឆាប់រហ័សសឹងមិនគួរឲ្យជឿ បន្ទាប់ពីអតីតប្រធានាធិបតីអាមេរិករូបនេះ ត្រូវគេប៉ុនប៉ងធ្វើឃាតមិនបានសម្រេចកាលពីពេលថ្មីៗកន្លងទៅ។ បើតាមការចុះផ្សាយរបស់ទស្សនាវដ្ដី Forbes គិតនៅត្រឹមថ្ងៃអង្គារទី១៦ ខែកក្កដា ឆ្នាំ២០២៤ លោក ត្រាំ បានកើនទ្រព្យសម្បត្តិចំនួន ២១,៨% ស្មើនឹង ១,២ពាន់លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកើនឡើងនេះ ភាគច្រើនបានមកពីកំណើនភាគហ៊ុននៅក្នុងក្រុមហ៊ុន Trump Media & Technology Group ដែលឡើងបានចំនួន ៣៥% ដោយក្នុង១ហ៊ុនមានតម្លៃ ៤២ដុល្លារ បើគិតត្រឹមថ្ងៃចន្ទកន្លងទៅ។ ក្រុមហ៊ុន Trump Media ដែលជាម្ចាស់បណ្ដាញសង្គម Truth Social មានសន្ទុះតម្លៃមូលធនប័ត្ររបស់ខ្លួនសរុបបានដល់ ៧,៩៨ពាន់លានដុល្លារ ហើយនៅក្នុងនោះលោក ត្រាំ មានចំណែកភាគហ៊ុនធំជាងគេចំនួន ៦៥%។

គិតនៅត្រឹមថ្ងៃទី១៦ ខែកក្កដា ទ្រព្យសម្បត្តិរបស់លោក ត្រាំ មានចំនួនប្រមាណ ៦,៥ពាន់លានដុល្លារ។

សូមបញ្ជាក់ជាថ្មី លោក ត្រាំ ត្រូវខ្មាន់កាំភ្លើងឈ្មោះ Thomas Matthew Crooks លបបាញ់ប្រហារចំនួន៩គ្រាប់ ខណៈពេលលោក ចូលរួមក្នុងពិធីជួបជុំអ្នកគាំទ្រសម្រាប់យុទ្ធនាការឃោសនាបោះឆ្នោតនៅទីក្រុង Butler នៃរដ្ឋ Pennsylvania កាលពីថ្ងៃសៅរ៍ទី១៣ ខែកក្កដា ឆ្នាំ២០២៤។

មនុស្ស២នាក់ត្រូវបានសម្លាប់ ក្នុងនោះមានម្នាក់ជាខ្មាន់កាំភ្លើង និងម្នាក់ជាអ្នកចូលរួមពិធីជួបជុំ ខណៈ២នាក់ទៀត រងរបួសធ្ងន់។ យ៉ាងណា លោក ត្រាំ មិនគ្រោះថ្នាក់ដល់អាយុជីវិតទេ គ្រាន់តែរបួសត្រង់ត្រចៀកប៉ុណ្ណោះ៕

ដោយ៖ ឈាង

ចុចអាន៖ ៤សំណួរ អាមេរិក មិនទាន់ឆ្លើយចេញ ករណីបាញ់ប្រហារលោក ត្រាំ