ព័ត៌មានអន្ដរជាតិ

វិបត្តិកាន់តែធ្ងន់ធ្ងរនៅមជ្ឈិមបូព៌ា ខណៈការប្តេជ្ញាសងសឹកកើនឡើងពេញបន្ទុក

បានផុស

១០ ខែ មុន

នៅ

ថ្ងៃពុធ ៣១ កក្កដា ២០២៤

ដោយ

ក្នុងរយៈពេលតែប៉ុន្មានម៉ោង អ៊ីស្រាអែលបានបាញ់សម្លាប់មេដឹកនាំកំពូលៗរបស់ក្រុមសកម្មប្រយុទ្ធដែលធ្វើចលនាប្រឆាំងអ៊ីស្រាអែល និងសហរដ្ឋអាមេរិកក្នុងទឹកដីនៃប្រទេសផ្សេងគ្នា គឺអ៊ីរ៉ង និងលីបង់។

មេដឹកនាំដ៏មានឥទ្ធិពលរបស់ក្រុមហាម៉ាស លោក Ismail Haniyeh ត្រូវបានធ្វើឃាតក្នុងការបាញ់ប្រហារពេលលោកស្នាក់នៅក្នុងប្រទេសអ៊ីរ៉ង់ មួយថ្ងៃបន្ទាប់ពីប្រធានាធិបតីថ្មីរបស់អ៊ីរ៉ង់ គឺលោក Masoud Pezeshkian ឡើងកាន់តំណែងជាផ្លូវការ និងបានប្រកាសគាំទ្រប៉ាឡេស្ទីន និងក្រុមសកម្មប្រយុទ្ធផ្សេងៗទៀតនៅក្នុងតំបន់មជ្ឈិមបូព៌ា។

មេដឹកនាំនយោបាយរបស់ក្រុមហាម៉ាស Ismail Haniyeh។ Anadolu

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយរដ្ឋអ៊ីរ៉ង់បានបញ្ជាក់ពីមរណភាពរបស់មេដឹកនាំក្រុមហាម៉ាសរូបនេះ។ ការធ្វើឃាត លោក Haniyeh បានកើតឡើងប៉ុន្មានម៉ោង បន្ទាប់ពីអ៊ីស្រាអែលបាននិយាយថា ខ្លួនបានសម្លាប់មេបញ្ជាការជាន់ខ្ពស់របស់ក្រុមហេសបូឡា គឺលោក Fouad Shukr នៅក្នុងការវាយប្រហារតាមអាកាសលើទីក្រុងបេរូត(Beirut) រដ្ឋធានីនៃប្រទេសលីបង់ជាប់ព្រំដែនប្រទេសអ៊ីស្រាអែល។

មរណភាពមេដឹកនាំកំពូលៗរបស់ក្រុមសកម្មប្រយុទ្ធដែលគាំទ្រដោយប្រទេសអ៊ីរ៉ង់ និងបណ្តាប្រទេសជាច្រើននៅតំបន់អារ៉ាប់កំពុងបង្កើនការព្រួយបារម្ភជាខ្លាំងថា «តំបន់នេះកំពុងរំកិលឆ្ពោះទៅរកសង្រ្គាមដ៏ពេញលេញ»។

ក្រោយមរណភាពរបស់លោក Haniyeh មុខមេដឹកនាំចលនាហហ៊ូធីក្នុងប្រទេសយ៉េមែន លោក Mohammed ALI AL-HOUTHI បានចេញសារមួយដែលមានខ្លឹមសារថា៖«ការកំណត់គោលដៅ Ismail Haniyeh គឺជាឧក្រិដ្ឋកម្មភេរវជនដ៏សាហាវ និងជាការបំពានច្បាប់ និងតម្លៃឧត្តមគតិ»។

ចំណែកមន្ត្រីជាន់ខ្ពស់ផ្សេងទៀតក្នុងក្រុមហាម៉ាស លោក SAMI ABU ZUHRI បានចេញសារមួយ ដោយអះអាងថា៖«ការធ្វើឃាតនេះដោយអ្នកកាន់កាប់អ៊ីស្រាអែល លើបងប្រុស Haniyeh គឺជាការកើនឡើងយ៉ាងធ្ងន់ធ្ងរដែលមានគោលបំណងបំបែកឆន្ទៈរបស់ក្រុមហាម៉ាស និងឆន្ទៈរបស់ប្រជាជនរបស់យើង ហើយសម្រេចបាននូវគោលដៅក្លែងក្លាយ។ យើងសូមអះអាងថា ការកើនឡើងនេះនឹងធ្វើឱ្យបរាជ័យគោលបំណងរបស់ពួកវា»។

សារនោះបានបន្តថា៖«ហាម៉ាសគឺជាគំនិតនិងជាស្ថាប័នមួយ មិនមែនមនុស្សទេ។ ហាម៉ាសនឹងបន្តនៅលើផ្លូវនេះដោយមិនគិតពីការលះបង់ ហើយយើងមានទំនុកចិត្តចំពោះជ័យជំនះ»។