៥យ៉ាង mpox ខុសពី កូវីដ-១៩

ត្បិតតែមេរោគនៃជំងឺ mpox កំពុងបំប្លែងខ្លួនក្នុងល្បឿនគួរឲ្យព្រួយបារម្ភក៏ពិតមែន ប៉ុន្តែអង្គការសុខភាពពិភពលោក (WHO) ចេញមុខអំពាវនាវឲ្យគ្រប់គ្នាកុំទាន់ស្លន់ស្លោ ហើយលោក Hans Kluge នាយកប្រចាំតំបន់អឺរ៉ុបរបស់ WHO អះអាងថា ជំងឺ mpox មិនបង្កការគំរាមកំហែងដល់សុខភាពសាធារណៈដូចជំងឺកូវីដ-១៩​ និងនាំទៅដល់ការរឹតត្បិតឡើយ។

ដូច្នេះយើងមកដឹងរឿង៥យ៉ាង ដែល mpox ខុសពី កូវីដ-១៩៖

១. Mpox មិនមែនជំងឺថ្មីទេ

Mpox មានឈ្មោះដើមថា Monkeypox ព្រោះគេរកឃើញជំងឺនេះដំបូងក្នុងខ្លួនសត្វស្វាកាលពីឆ្នាំ១៩៥៨ នៅប្រទេសដាណឺម៉ាក។ ក្រោយមក ករណីឆ្លងលើមនុស្សជាលើកដំបូងគឺក្នុងឆ្នាំ១៩៧០ នៅសាធារណរដ្ឋប្រជាធិបតេយ្យកុងហ្គោ។

ផ្ទុយទៅវិញ កូវីដ១៩ គឺជាជំងឺថ្មីដែលបង្កឡើងដោយមេរោគ SARS-CoV2 ឆ្លងមកមនុស្សក្នុងឆ្នាំ២០១៩ នៅទីក្រុង Wuhan ប្រទេសចិន រួចក៏ក្លាយជាជំងឺរាតត្បាតជាសកលតែម្តង។

២. Mpox មិនឆ្លងដូចកូវីដ១៩ទេ

ត្បិតតែជំងឺ Mpox ឆ្លងតាមរយៈទំនាក់ទំនងជិតស្និទ្ធស្រដៀងទៅនឹងកូវីដ១៩ក៏ពិតមែន ប៉ុន្តែ Mpox មិនឆ្លងតាមខ្យល់ដូចកូវីដឡើយ។ mpox ឆ្លងតាមរយៈរួមភេទ ប៉ះពាល់ស្បែកទល់ស្បែក និងការនិយាយឬដកដង្ហើមនៅជិតមនុស្សម្នាក់ទៀត។ 

៣. វ៉ាក់សាំង Mpox មានចាក់រួចទៅហើយ

វ៉ាក់សាំង Mpox មានចាក់រួចទៅហើយ ខុសពីជំនាន់កូវីដ ដែលពេលមេរោគចាប់ផ្តើមរាតត្បាតខ្លាំង ក្រុមអ្នកវិទ្យាសាស្រ្តនៅសិក្សានិងខិតខំបង្កើតវ៉ាក់សាំងនៅឡើយ។ ទម្រាំតែវ៉ាក់សាំងកូវីដ ផលិតរួចរាល់ ជំងឺនេះបានឆក់យកជីវិតមនុស្សរាប់ម៉ឺននាក់រួចទៅហើយ។

៤. មេរោគបង្កជំងឺ mpox បំប្លែងខ្លួនយឺតជាងកូវីដ

ត្បិតមេរោគនៃជំងឺ mpox កំពុងបំប្លែងខ្លួនក្នុងល្បឿនគួរឲ្យព្រួយបារម្ភក៏ពិតមែន ប៉ុន្តែបើធៀបជាមួយកូវីដ១៩ វានៅមានល្បឿនយឺតជាង។

គ្រប់គ្នាដឹងហើយថា កូវីដបានក្លាយពូជច្រើនប្រភេទយ៉ាងរហ័សដូចជា Alpha, Beta, Delta, និង Omicron ជាដើម ចំណែក mpox វិញ មិនទាន់ក្លាយពូជច្រើនដូចនោះទេ ខណៈបច្ចុប្បន្នពូជគ្រោះថ្នាក់បំផុតរបស់ mpox គឺ​មានតែ clade 1b ប៉ុណ្ណោះ។

៥. mpox មិនតម្រូវឲ្យមានវិធានការរឹតត្បិត បិទព្រំដែន ឬកាតព្វកិច្ចចាក់វ៉ាក់សាំងឡើយ

WHO បញ្ជាក់ហើយថា ជំងឺ mpox មិនតម្រូវឲ្យមានវិធានការរឹតត្បិត បិទព្រំដែន ឬកាតព្វកិច្ចចាក់វ៉ាក់សាំងដូចកាលកូវីដឡើយ ប៉ុន្តែយ៉ាងណា ពិភពលោក ត្រូវតែសហការគ្នានិងសាមគ្គី ដើម្បីគ្រប់គ្រងជំងឺនេះឲ្យបាន៕

អត្ថបទ៖ សុខ សុវណ្ណ

ចុចអាន៖ ទីបំផុត ទ្វីបអាហ្វ្រិក ទទួលបានអាវុធ ប្រយុទ្ធជាមួយជំងឺ mpox