​មីយ៉ាន់ម៉ា​ក៏មាន​​មនុស្សស្លាប់ច្រើន​និង​ផលប៉ះពាល់​ធ្ងន់ធ្ងរ​​ ដោយសារ​ព្យុះ Yagi ដែរ​

យ៉ាងហោចណាស់មនុស្ស១៧នាក់បានស្លាប់ក្នុងទឹកជំនន់ដែលបង្កឡើងដោយភ្លៀងធ្លាក់ខ្លាំងនៅទីប្រជុំជន Yamethin ក្នុងតំបន់ Mandalay ក្នុងរយៈពេលពីរថ្ងៃជាប់គ្នា ស្របពេលប្រទេសវៀតណាមនិងប្រទសថៃទទួលរងឥទ្ធិពលដ៏ធ្ងន់ធ្ងរពីព្យុះ Yagi បង្កឲ្យមានទឹកជនន់និងខ្យល់ព្យុះកាចដ៏សាហាវ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន xinhua នៅថ្ងៃទី១៣ខែកញ្ញានេះ។

ភ្លៀងធ្លាក់ខ្លាំងដែលបង្កឡើងដោយខ្យល់មូសុងខ្លាំង និងឥទ្ធិពលពីព្យុះទីហ្វុង Yagi បាននាំឱ្យមានទឹកជំនន់យ៉ាងធ្ងន់ធ្ងរនៅក្នុងតំបន់ជាច្រើននៅទូទាំងប្រទេសមីយ៉ាន់ម៉ា ខណៈបច្ចុប្បន្នភាគកណ្តាលនៃប្រទេសមីយ៉ាន់ម៉ា គឺជាតំបន់ដែលរងគ្រោះខ្លាំងជាងគេក្នុងចំណោមតំបន់ដែលរងផលប៉ះពាល់ដោយទឹកជំនន់។

យោងតាមរបាយការណ៍ប្រព័ន្ធផ្សព្វផ្សាយផ្លូវការ ទឹកជំនន់បានប៉ះពាល់ដល់ផ្នែកផ្លូវដែក និងស្ថានីយរថភ្លើងមួយចំនួន ដែលបានបណ្ដាលឲ្យសេវារថភ្លើងលើផ្លូវ Yangon-Mandalay និង Thar Si-Shwe Naung ត្រូវបានផ្អាកជាបណ្តោះអាសន្ន ដោយសារទឹកគ្របដណ្តប់ផ្លូវរថភ្លើង។

គួរបញ្ជាក់ថាក្នុងរយៈប៉ុន្មានសប្ដាហ៍នេះ ឥទ្ធិពលរបស់ព្យុះដ៏កាចសាហាវហាវ Yagi បានជះឥទ្ធិពលដល់ប្រទេសនានានៅអាស៊ីអាគ្នេយ៍ដូចជាប្រទេសវៀតណាម ថែ ឡាវ កម្ពុជា​ និង មីយ៉ាន់ម៉ា​ ខណៈប្រទេសវៀតណាមគឺជាប្រទេសវៀតណាមគឺជាប្រទេសដែលរងផលប៉ះពាល់ជាងគេ ដោយមានមនុស្សស្លាប់រហូតទៅដល់ជិត២០០នាក់ និងជម្លៀសមនុស្សរាប់ពាន់នាក់ដោយសារទឹកជំនន់ដ៏ធ្ងន់ធ្ងរ៕

អត្ថបទ៖ ប៊ុន សុភាព