UN៖​មនុស្ស​ជិត​១០ម៉ឺន​នាក់បោះបង់ផ្ទះនិង រាប់​សិប​ម៉ឺន​នាក់​​ប្រឈម​​ខ្វះខាត​​​​​នៅលីបង់​

អំពើហិង្សានៅសប្តាហ៍នេះនៅក្នុងប្រទេសលីបង់បានបង្ខំមនុស្សជាង ៩០០០០នាក់ចេញពីផ្ទះរបស់ពួកគេក្នុងនោះ ៧០០០នាក់បានសម្រុកចូលទៅក្នុងសាលារៀនចំនួន៤០០ និងកន្លែងផ្សេងទៀត។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី ២៧​ខែកញ្ញានេះ។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានបូកសរុបចំនួននៃការផ្លាស់ទីលំនៅចាប់តាំងពីថ្ងៃចន្ទជាមួយនឹងទិន្នន័យពីអង្គការអន្តរជាតិសម្រាប់ការធ្វើចំណាកស្រុក (IOM) ដែលបានរាយការណ៍ថា ខ្លួនរំពឹងថា ចំនួននឹងកើនឡើង។ OCHA មានការព្រួយបារម្ភយ៉ាងខ្លាំងចំពោះសុវត្ថិភាពរបស់ជនស៊ីវិលនៅតាមខ្សែ​បន្ទាត់​ព្រំ​ដែន​ពណ៌ខៀវរវាងអ៊ីស្រាអែលនិងលីបង់។

ទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) នៅក្នុងប្រទេសស៊ីរីបានប៉ាន់ប្រមាណថា មនុស្សជាង ១០០០០នាក់ ទាំងជនជាតិលីបង់ និងស៊ីរី បានឆ្លងពីប្រទេសលីបង់ ចូលទៅក្នុងប្រទេសស៊ីរី ដោយសារតែអរិភាព​រវាង​អ៊ីស្រាអែល​និង​​ហេសបូឡា​លីបង់​។

ស្ថាប័នពិភពលោក និងដៃគូរបស់ UN បានផ្តល់អាហារ ទឹក ពូក និងសម្ភារៈអនាម័យ ខណៈការកើនឡើងនៃអំពើហិង្សានាពេលថ្មីៗនេះក៏កំពុងប៉ះពាល់ដល់ការអប់រំ សុខភាព និងកន្លែងរស់​នៅ​សម្រាប់ជនស៊ីវិលផ្សេងទៀតនៅក្នុងប្រទេសលីបង់ ដោយបានធ្វើឲ្យក្រសួងអប់រំរបស់ប្រទេសលីបង់ពន្យារពេលចាប់ផ្តើមឆ្នាំសិក្សារហូតដល់ថ្ងៃទី១៤ខែតុលា ដែលប៉ះពាល់ដល់សិស្សរាប់ពាន់នាក់នៅទូទាំងប្រទេស។

លើសពីនេះ ការវាយប្រហារតាម​អាកាសរបស់អ៊ីស្រាអែលកាលពីថ្ងៃពុធ​ក៏បានធ្វើឱ្យខូចខាតដល់ស្ថានីយ៍ទឹកចំនួន​៤ បន្ថែម​​ទៀត ដែលនាំឱ្យចំនួនសរុបនៃគ្រឿងបរិក្ខារបែបនេះរងផលប៉ះពាល់ចាប់តាំងពីខែតុលា​ឆ្នាំ២០២៣ ដល់ឆ្នាំ២០២៤ ​ដែល​ប៉ះពាល់ដល់លទ្ធភាពទទួលបានទឹកស្អាតសម្រាប់មនុស្សជាង​២៥ម៉ឺន​នាក់​។

ឆ្លើយតបនឹងបញ្ហានេះមូលនិធិប្រជាជនអង្គការសហប្រជាជាតិ (UNFPA) បានផ្តល់សម្ភារៈអនាម័យ និងផលិផលសម្រាប់​ស្រ្តីដល់ស្ត្រី និងកុមារីដែលផ្លាស់ទីលំនៅ។ ជាមួយគ្នានេះ មូលនិធិកុមាររបស់អង្គការសហប្រជាជាតិ (UNICEF) បានប្រគល់ការផ្គត់ផ្គង់សំខាន់ៗ រួមមាន ទឹក ភួយ និងសម្ភារៈអនាម័យ ដល់ទីជម្រករួមផងដែរ។

លើសពីនេះកម្មវិធីស្បៀងអាហារពិភពលោកបានរាយការណ៍ពីការរៀបចំទីតាំងអាហារឱ្យបានគ្រប់គ្រាន់សម្រាប់ផ្គត់ផ្គង់មនុស្សចំនួន ២៥ម៉ឺន​នាក់​សម្រាប់រយៈពេលប្រាំថ្ងៃ ដោយទីភ្នាក់ងារជំនួយរបស់អង្គការសហប្រជាជាតិសម្រាប់ប្រជាជន​ប៉ាឡេស្ទីន​ដែល​ត្រូវបានគេស្គាល់ថា UNRWA និង IOM ក៏បានផ្តល់ពូក ភួយ និងការផ្គត់ផ្គង់បន្ថែមដើម្បីគាំទ្រដល់ជនភៀសខ្លួនផងដែរ៕

អត្ថបទ៖ ប៊ុន សុភាព