ព្យុះភ្លៀង និងទឹកជំនន់រហ័ស​​វាយលុក​ប្រទេស​បូស្នៀនៅ​​​តំបន់​បាល់​កង់​​

ព្យុះភ្លៀងដ៏ខ្លាំងបង្កើតជាទឹកជំនន់និងបំណាក់ដីបានវាយប្រហារប្រទេសបូស្នៀពេញមួយយប់ថ្ងៃសុក្រ សម្លាប់មនុស្សយ៉ាងហោចណាស់១៩នាក់នៅភាគកណ្តាល និងភាគខាងត្បូងនៃប្រទេស ខណៈ​បរិមាណ​ទឹកបានកើន​ឡើងយ៉ាងខ្លាំង​ហូរ​ចូលផ្ទះប្រជាជនភ្លាមៗពេលពួកគេកំពុងដេកលក់។

ក្រុមជួយសង្គ្រោះនៅភាគខាងត្បូងប្រទេសបានឲ្យដឹងថា មនុស្សមួយចំនួនបានបាត់ខ្លួន ហើយបានអំពាវនាវដល់អ្នកស្ម័គ្រចិត្ត និងកងទ័ពឱ្យជួយ ស្រប​ពេល​ដែលផ្លូវត្រូវបានបិទ។ ផ្ទះដែលនៅសេសសល់គ្មានអគ្គិសនីប្រើប្រាស់ ខណៈមនុស្សជាច្រើនបានរងផលប៉ះពាល់និង ត្រូវបានជម្លៀសចេញជាបន្ទាន់។

ខ្សែវីដេអូ​ដែល​ថត​បាន​ដោយ​ដ្រូន ដែលបានចាក់ផ្សាយនៅលើប្រព័ន្ធផ្សព្វផ្សាយរបស់ប្រទេសនេះ បានបង្ហាញពីភូមិ និង​ទីប្រជុំជនទាំងអស់បានលិចនៅក្រោមទឹក ខណៈដែលវីដេអូនៅលើបណ្តាញសង្គមបានបង្ហាញពីទិដ្ឋភាព​ទឹក​ភក់​ដ៏គួរឱ្យភ្ញាក់ផ្អើល និងផ្លូវដែលរងការខូចខាតយ៉ាងធ្ងន់ធ្ងរ។

លើសពីនេះផ្លូវដ៏មមាញឹកបំផុតមួយ ដែលតភ្ជាប់ពី​ទីក្រុង​​​ Sarajevo ជាមួយឆ្នេរ Adriatic ត្រូវបានទឹកហូរចូលទៅក្នុងទន្លេ។ មនុស្ស​ជា​ច្រើន​ត្រូវ​បាន​រង​គ្រោះ​ដោយ​សារ​ទឹក​ជំនន់ និង​ការ​បាក់​ដីជាបន្តបន្ទាប់ ខណៈមាន​ព័ត៌មាន​អំពី​ជនរងគ្រោះ ​អ្នក​របួស និង​បាត់​ខ្លួន​ជាច្រើន​នាក់ គ្រាន់តែមិនទាន់មានចំនួនលម្អិត។ ឆ្លើយតបនឹងបញ្ហានេះ អាជ្ញាធរ​បាន​ជំរុញ​ឲ្យ​ប្រជាពលរដ្ឋ​ស្នាក់នៅ​ជាន់​ខាងលើ​នៃ​ផ្ទះ​របស់​ពួកគេ​ ដោយសារទឹកហក់ឡើងខ្លាំងអាចនាំយករបស់របរក្នុងផ្ទះនិងរថយន្ត និងជន់លិចអគារជាន់ក្រោមយ៉ាងលឿន។

ខ្យល់បក់ខ្លាំងបានបង្អាក់ចរាចរណ៍នៅតាមបណ្តោយឆ្នេរសមុទ្រភាគខាងត្បូងនៃសមុទ្រ Adriatic ហើយទឹកជំនន់យ៉ាងគំហុកដែលបណ្តាលមកពីភ្លៀងធ្លាក់ខ្លាំងបានគំរាមកំហែងដល់ទីក្រុង និងភូមិជាច្រើនក្នុងប្រទេសក្រូអាស៊ីផងដែរ។ ជាមួយគ្នានេះ​ទឹកជំនន់​ដែល​បង្កឡើងដោយភ្លៀងធ្លាក់ខ្លាំងក៏ត្រូវបានរាយការណ៍ផងដែរនៅក្នុងប្រទេសម៉ុងតេណេហ្គ្រោ ភាគខាងត្បូងនៃប្រទេសបូស្នៀ ដោយមានភូមិមួយចំនួនត្រូវបានរងប៉ះពាល់ ផ្លូវត្រូវបានកាត់ផ្ដាច់ដោយសារទឹកជំនន់ និងផ្ទះប្រជាពលរដ្ឋជាច្រើនត្រូវបានជន់លិច៕

អត្ថបទ៖ ប៊ុន សុភាព