អាមេរិក ប្រកាសបញ្ជូនខែលការពារមីស៊ីល THAAD និងទ័ព ១០០នាក់ ទៅជួយ អ៊ីស្រាអែល

សហរដ្ឋអាមេរិកបានប្រកាសកាលពីថ្ងៃអាទិត្យទី១៣ខែតុលាឆ្នាំ២០២៤ថា ខ្លួននឹងបញ្ជូនប្រព័ន្ធការពារដែនអាកាស THAAD និងកងទ័ពប្រតិបត្តិការប្រហែល១០០នាក់ទៅកាន់ប្រទេសអ៊ីស្រាអែល ដើម្បីជួយបង្កើនសមត្ថភាពឆ្លើយតបមីស៊ីលរបស់សម្ព័ន្ធមិត្តខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអ្នកនាំពាក្យមន្ទីរបញ្ចកោណលោក Patrick Ryder, ការបញ្ជូននេះគឺជាជំនួយរបស់យោធាអាមេរិកដើម្បីគាំទ្រអ៊ីស្រាអែល និងការពារកងកម្លាំងអាមេរិក ពីការវាយប្រហារដោយអ៊ីរ៉ង់ឬក្រុមប្រដាប់អាវុធគាំទ្រដោយទីក្រុងតេហេរ៉ង់នៅក្នុងតំបន់។

ក្រោយមក ប្រធានាធិបតីអាមេរិកលោក ចូ បៃដិន ក៏អះអាងដែរថា វិធានការនេះគឺដើម្បីការពារអ៊ីស្រាអែល បន្ទាប់ពីប្រទេសអ៊ីរ៉ង់ បាញ់មីស៊ីលសងសឹកប្រទេសសម្ព័ន្ធមិត្តកាលពីដើមខែនេះ។

ទោះបីជាយ៉ាងណាក៏ដោយ សហរដ្ឋអាមេរិក មិនបានបញ្ជាក់ពីច្បាស់ឡើយថាតើថ្ងៃណា ទើបប្រព័ន្ធការពារដែនអាកាសនេះ នឹងត្រូវបញ្ជូនទៅដល់អ៊ីស្រាអែល។

ការដាក់ពង្រាយនេះធ្វើឡើងចំពេលអ៊ីស្រាអែល ត្រៀមឆ្លើយតបទៅការវាយប្រហារដោយមីស៊ីលរបស់អ៊ីរ៉ង់នៅថ្ងៃទី១ខែតុលា ដែលកាលនោះមានមីស៊ីលប្រហែល២០០គ្រាប់ បាញ់សន្ធាប់លើគោលដៅយោធាអ៊ីស្រាអែល សងសឹកចំពោះការធ្វើឃាតមេដឹកនាំក្រុមហាម៉ាស Ismail Haniyeh, មេដឹកនាំក្រុមហេសបូឡា Hassan Nasrallah និងមេទ័ពអ៊ីរ៉ង់ម្នាក់ទៀត។

ពាក់ព័ន្ធបញ្ហានេះ រដ្ឋមន្ត្រីការបរទេសអ៊ីរ៉ង់ លោក Abbas Araqchi បានព្រមានថា ទីក្រុងវ៉ាស៊ីនតោន កំពុងដាក់កងទ័ពអាមេរិកនៅក្នុងគ្រោះថ្នាក់ហើយ ខណៈទីក្រុងតេហេរ៉ង់ នឹងគិតពីផលប្រយោជន៍ជាតិនិងប្រជាជនរបស់ខ្លួនជាធំ។

សូមបញ្ជាក់ថា យោធា​អាមេរិក​កម្រ​ដាក់​ពង្រាយ​ទ័ព​ទៅ​អ៊ីស្រាអែលណាស់ លើក​លែង​តែ​ទៅធ្វើសមយុទ្ធប៉ុណ្ណោះ ហើយទោះក្នុងរយៈពេលប៉ុន្មានខែថ្មីៗនេះ រដ្ឋាភិបាលក្រុងវ៉ាស៊ីនតោន បានជួយទីក្រុង Tel Aviv ការពារខ្លួននិងស្ទាក់ចាប់មីស៊ីលពីទីក្រុង តេហរ៉ង់ ក៏ពិតមែន ប៉ុន្តែកងកម្លាំងអាមេរិក មិនឈរជើងនៅខាងក្នុងប្រទេសអ៊ីស្រាអែលទេ៕

អត្ថបទ៖ សុខ សុវណ្ណ

ចុចអាន៖ កងរក្សាសន្តិភាព UN ម្នាក់ទៀត ត្រូវរបួសនៅ លីបង់