ព័ត៌មានអន្ដរជាតិ

តៃវ៉ាន់ ចល័តទ័ពនិងសព្វាវុធចូលតាមទីតាំងឈរជើងរួចអស់ហើយ ខណៈចិនធ្វើសមយុទ្ធ

បានផុស

៨ ខែ មុន

នៅ

ថ្ងៃចន្ទ ១៤ តុលា ២០២៤

ដោយ

គ្រាន់តែប្រទេសចិន ចាប់ផ្តើមធ្វើសមយុទ្ធទ្រង់ទ្រាយធំព័ទ្ធជុំវិញតៃវ៉ាន់ភ្លាម, ប្រធានាធិបតីកោះនេះ គឺលោក William Lai បានចេញសេចក្តីថ្លែងការណ៍ភ្លាមៗ ដោយអះអាងថា កងទ័ពនិងឆ្មាំសមុទ្ររបស់ខ្លួន បានចល័តចូលតាមទីតាំងឈរជើងទាំងសមុទ្រនិងអាកាសរួចអស់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយនឹងសេចក្តីប្រកាសនេះ ក្រសួងការពារជាតិតៃវ៉ាន់ ក៏បានបញ្ចេញវីដេអូនិងរួបភាពបង្ហាញពីការចល័តទ័ពនិងសព្វាវុធ ព្រមទាំងគ្រឿងសឹក ដើម្បីត្រៀមលក្ខណៈផងដែរ។

លោក Lai ប្រកាសថា សមយុទ្ធរបស់ចិនគឺមានបំណងបង្អាក់សន្តិភាពនិងស្ថិរភាពក្នុងតំបន់ ហើយជាការប៉ុនប៉ងបង្ខិតបង្ខំប្រទេសជិតខាងរបស់ចិនដោយប្រើកម្លាំង។ រដ្ឋាភិបាលនឹងការពារប្រព័ន្ធប្រជាធិបតេយ្យ និងសន្តិសុខជាតិរបស់តៃវ៉ាន់ ស្របពេលប្រឈមមុខនឹងការគំរាមកំហែងពីខាងក្រៅ។

សូមបញ្ជាក់ថា នៅថ្ងៃចន្ទទី១៤ខែតុលា យោធាចិន បានចាប់ផ្ដើមសមយុទ្ធថ្មីមួយចុងក្រោយ ជុំវិញតៃវ៉ាន់ ហើយប្រាប់ថា វាគឺជាការព្រមានដ៏ធំមួយចំពោះសកម្មភាពផ្ដាច់ខ្លួននិយមរបស់ដែនកោះមួយនេះ។

បើតាមសេចក្ដីថ្លែងការណ៍របស់យោធាចិននៅម៉ោង៥ព្រឹកថ្ងៃចន្ទ សមយុទ្ធលើកនេះ មានឈ្មោះថា «Joint Sword-2024B» ហើយរៀបចំនៅតំបន់ចំនួន៩ ហ៊ុមព័ទ្ធតៃវ៉ាន់ ដោយ២ទីតាំងនៅឆ្នេរភាគខាងកើតតៃវ៉ាន់ ៣ទីតាំងនៅឆ្នេរភាគខាងលិច ១ទីតាំងនៅភាគខាងជើង និង៣ទីតាំងនៅតំបន់កោះដែលតៃវ៉ាន់គ្រប់គ្រងហើយស្ថិតនៅក្បែរប្រទេសចិន។

ក្នុងសេចក្ដីថ្លែងការណ៍ដដែល បានរៀបរាប់ទៀតថា៖ «សមយុទ្ធនេះក៏ដើរតួជាការព្រមានយ៉ាងម៉ឺងម៉ាត់ចំពោះទង្វើផ្តាច់ខ្លួនរបស់កងកម្លាំងឯករាជ្យតៃវ៉ាន់ផងដែរ។ វាគឺជាប្រតិបត្តិការស្របច្បាប់ និងចាំបាច់សម្រាប់ការពារអធិបតេយ្យរដ្ឋនិងឯកភាពជាតិ»។

សមយុទ្ធរបស់ប្រទេសចិន បានកើតឡើងប៉ុន្មានថ្ងៃបន្ទាប់ពីរដ្ឋមន្ត្រីការបរទេសសហរដ្ឋអាមេរិក លោក Antony Blinken បានព្រមានទីក្រុងប៉េកាំង ប្រឆាំងនឹងការចាត់វិធានការណាមួយឆ្លើយតបទៅកោះតៃវ៉ាន់៕

អត្ថបទ៖ សុខ សុវណ្ណ

ចុចអាន៖ ចិន ធ្វើសមយុទ្ធក្នុងតំបន់ចំនួន៩ ព័ទ្ធជុំវិញកោះតៃវ៉ាន់