លោក ហ្សេលេនស្គី៖ អាល្លឺម៉ង់ ខ្លាចរុស្ស៊ី ទើបមិនហ៊ានឲ្យអ៊ុយក្រែន ចូលណាតូ

គ្រាន់តែវិលត្រឡប់មកពីដំណើរទស្សនកិច្ចនៅអឺរ៉ុបខាងលិចភ្លាម លោក វ្ល៉ាឌីមៀរ ហ្សេលេនស្គី ស្រាប់តែស្តីឲ្យប្រទេសអាល្លឺម៉ង់ខ្លាំងៗ ដោយបន្ទោសថា ការដែលទីក្រុងបែរឡាំង មិនគាំទ្រឲ្យអ៊ុយក្រែន ក្លាយជាសមាជិកអង្គការណាតូ គឺព្រោះតែខ្លាចរុស្ស៊ីមានប្រតិកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT នៅថ្ងៃពុធទី២៣ខែតុលាឆ្នាំ២០២៤ ប្រធានាធិបតិអ៊ុយក្រែន ប្រាប់ក្រុមអ្នកសារព័ត៌មាននៅទីក្រុងកៀវថា «ខ្ញុំឃើញគ្រប់យ៉ាង ហើយឃើញរឿងដែលអ្នករាល់គ្នាមិនឃើញ។ ភាគីអាល្លឺម៉ង់ នៅស្រពេចស្រពិលរឿងឲ្យយើងចូលណាតូ។ អាជ្ញាធរក្រុងបែរឡាំង ខ្លាចប្រធានបទណាតូ-អាល្លឺម៉ង់ និងប្រតិកម្មពីរុស្ស៊ី ហើយនោះគឺជាការពិត»។

ទោះបីជាយ៉ាងណាក៏ដោយ ស្របពេលជាមួយគ្នានោះ លោកក៏ទទួលស្គាល់ដែរថា បន្ទាប់ពីអាមេរិក គឺប្រទេសអាល្លឺម៉ង់នេះហើយ ដែលជាម្ចាស់ជំនួយធំទាំងផ្នែកហិរញ្ញវត្ថុនិងយោធា ជួយដល់អ៊ុយក្រែន ដើម្បីតតាំងជាមួយកងទ័ពរបស់លោក ពូទីន។

សូមបញ្ជាក់ថា ដំបូងឡើយ អ៊ុយក្រែនសង្ឃឹមទទួលបានការអញ្ជើញឲ្យចូលរួមជាមួយអង្គការណាតូតាំងតែពីឆ្នាំមុនមកម្ល៉េះ ហើយប្លុកនេះ ក៏បានអនុម័តសេចក្តីប្រកាសមួយ ដែលបញ្ជាក់ថា ទីក្រុងកៀវនឹងក្លាយជាសមាជិករបស់ខ្លួនផងដែរ នៅពេលសម្ព័ន្ធមិត្តទាំងឡាយបើកភ្លើងខៀវ និងលក្ខខណ្ឌត្រូវបានបំពេញ ប៉ុន្តែក្រោយមក មានរដ្ឋជាសមាជិកមួយចំនួនបដិសេធ។

ពាក់ព័ន្ធបញ្ហានេះ រុស្ស៊ី​បានព្រមានម្តងហើយម្តងទៀតថា ខ្លួន​មិន​ទទួល​យកបានឡើយ ហើយទាមទារតែម្យ៉ាងគត់ នោះគឺអ៊ុយក្រែន ត្រូវតែរក្សាឋានៈខ្លួនជាប្រទេស​អព្យាក្រឹត និងថែមទាំងបញ្ជាក់យ៉ាងច្បាស់ថា ការធ្វើទំនើបកម្មយោធារបស់ទីក្រុងកៀវ គឺជាការគំរាមកំហែងដល់សន្តិសុខជាតិរុស្ស៊ី ហើយទីក្រុង មូស្គូ មានសិទ្ធិក្នុងការឆ្លើយតប៕ 

អត្ថបទ៖ សុខ សុវណ្ណ

ចុចអាន៖ ទៅដល់អ៊ុយក្រែនស្ងាត់ៗ រដ្ឋមន្ត្រីការពារជាតិអាមេរិក ប្រាប់ ហ្សេលេនស្គី ថា ចង់បានអីនិយាយមក