អ៊ីស្រាអែល សម្រេចហាមឃាត់ទីភ្នាក់ងារជំនួយ UN លែងឲ្យធ្វើការលើដីរបស់ខ្លួន

នៅថ្ងៃអង្គារទី២៩ខែតុលាឆ្នាំ២០២៤ សភាអ៊ីស្រាអែល បានបោះឆ្នោតជាមួយសំឡេង៩២ទល់១០ អនុម័តច្បាប់ហាមឃាត់ទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ ហៅកាត់ UNRWA លែងឲ្យធ្វើប្រតិបត្តិការនៅក្នុងប្រទេសអ៊ីស្រាអែល និងទីក្រុងហ្ស៊េរុយសាឡិមខាងកើតទៀតហើយ ប៉ុន្តែទុកពេលឲ្យបីខែទៀត ទើបចាប់ផ្តើមអនុវត្តជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះ សូម្បីទំនាក់ទំនងរវាងក្រុមការងារ UNRWA និងមន្រ្តីអ៊ីស្រាអែល ក៏ត្រូវហាមឃាត់ផងដែរ ដូច្នេះមានន័យថា បុគ្គលិក UNRWA នឹងមិនមានអភ័យឯកសិទ្ធិស្របច្បាប់ទៀតទេនៅក្នុងប្រទេសអ៊ីស្រាអែល ហើយទីស្នាក់ការកណ្តាលរបស់ខ្លួននៅហ្ស៊េរុយសាឡិមខាងកើត ក៏នឹងត្រូវបិទទ្វារផងដែរ។

ទង្វើនេះត្រូវគេមើលឃើញច្បាស់ថា នឹងធ្វើឲ្យអង្គការនេះជួបឧបសគ្គក្នុងការចែកចាយជំនួយទៅកាន់ប្រជាជនដែលកំពុងរងទុក្ខវេទនានៅតំបន់ហ្គាហ្សានិង វេសប៊េង ព្រោះតាមធម្មតា អង្គការនេះតែងធ្វើកិច្ចសហប្រតិបត្តិការជាមួយយោធាអ៊ីស្រាអែល ដើម្បីចែកចាយជំនួយ។

ក្រោយការអនុម័តច្បាប់នេះ ក្រសួងក្រុងហ្ស៊េរុយសាឡិមរបស់អ៊ីស្រាអែល នឹងត្រូវទទួលភារកិច្ចជំនួស UNRWA ក្នុងការចែកចាយជំនួយដោយសហការណ៍ជាមួយបណ្តាភ្នាក់ងារដែល ផ្តល់មូលនិធិដោយឯករាជ្យ។

ជុំវិញរឿងនេះដែរ នាយករដ្ឋមន្រ្តីអ៊ីស្រាអែល Benjamin Netanyahu និយាយថា «បុគ្គលិក UNRWA ដែលចូលរួមក្នុងសកម្មភាពភេរវកម្ម ប្រឆាំងអ៊ីស្រាអែលត្រូវតែទទួលខុសត្រូវ។ យើងត្រៀមខ្លួនធ្វើការជាមួយដៃគូអន្តរជាតិដើម្បីធានាថា អ៊ីស្រាអែលនៅតែជួយសម្រួលដល់ជំនួយមនុស្សធម៌ចំពោះជនស៊ីវិលនៅតំបន់ហ្គាហ្សា តាមរបៀបដែលមិនគំរាមកំហែងដល់សន្តិសុខរបស់អ៊ីស្រាអែល»។

មួយលើកជាពីរលើក អ៊ីស្រាអែលតែងនិយាយថា បុគ្គលិក UNRWA បានឃុបឃិតជាមួយក្រុមហាម៉ាសនៅហ្គាហ្សាហើយអះអាងថា មានបុគ្គលិក១៩នាក់ បានចូលរួមក្នុងការវាយប្រហាររបស់ក្រុមហាម៉ាសនៅថ្ងៃទី៧ខែតុលាឆ្នាំ២០២៣។

សូមបញ្ជាក់ថា UNRWA ត្រូវបានបង្កើតឡើងក្នុងឆ្នាំ១៩៤៩ ដើម្បីដោះស្រាយជាមួយជនភៀសខ្លួនប៉ាឡេស្ទីន ក្រោយការបង្កើតរដ្ឋអ៊ីស្រាអែលនិងសង្គ្រាមអារ៉ាប់។ យ៉ាងណា ទីក្រុងហ្ស៊េរុយសាឡិមខាងលិច បានចោទប្រកាន់អង្គការនេះ ថាបានជួយដល់ក្រុមហាម៉ាសនិងចលនាសកម្មប្រយុទ្ធប៉ាឡេស្ទីនផ្សេងទៀត៕

អត្ថបទ៖ សុខ សុវណ្ណ

ចុចអាន៖ UN៖ ​សង្គ្រាមប៉ះពាល់ដល់ស្ត្រី និងក្មេងស្រីជាង ៦០០លាននាក់​​កើន​ឡើង​៥០%​​