ណេតាន់យ៉ាហ៊ូ បញ្ជាដាច់ណាត់៖ «កម្ទេចរាល់ហេដ្ឋារចនាសម្ព័ន្ធហេសបូឡា កុំឱ្យសេសសល់ ក្នុង​ប្រទេស​លីបង់»

លោកនាយករដ្ឋមន្ត្រី បេនចាមីន ណេតាន់យ៉ាហ៊ូ បានចេញបញ្ជាយ៉ាងម៉ឺងម៉ាត់ទៅកាន់កងទ័ពអ៊ីស្រាអែល ឱ្យវាយកម្ទេចរាល់ហេដ្ឋារចនាសម្ព័ន្ធទាំងអស់របស់ក្រុម​សកម្ម​ប្រយុទ្ធ​ហេសបូឡា ដែលជាក្រុម​ត្រូវបាន​គាំទ្រដោយប្រទេសអ៊ីរ៉ង់ នៅភាគខាងត្បូងប្រទេសលីបង់។ នេះ​បើយោងតាម​ការចុះផ្សាយរបស់​សារព័ត៌មាន DPA នា​ថ្ងៃទី​១ ខែ​កក្កដា ឆ្នាំ​២០២៦។

នៅក្នុងឱកាសចុះសួរសុខទុក្ខកងទ័ព លោក ណេតាន់យ៉ាហ៊ូ បានសង្កត់ធ្ងន់ទៅលើរាល់សំណង់អគារទាំងឡាយណាដែលនៅពីលើដី និងរូងក្រោមដីផ្សេងៗ ដែលក្រុមនេះធ្លាប់ប្រើប្រាស់សម្រាប់វាយប្រហារលើអ៊ីស្រាអែល ដោយលោកបានប្រាប់ចំៗថា «នេះជាបទបញ្ជា៖ មិនត្រូវទុកអ្វីចោលឱ្យនៅសេសសល់ឡើយ»។

ក្រៅពីការបញ្ជាឱ្យកម្ទេចហើយ លោកនាយករដ្ឋមន្ត្រីរូបនេះ ក៏បានណែនាំឱ្យកងទ័ពវាយបកភ្លាមៗដោយគ្មានការរង់ចាំ ប្រសិនបើពួកគេមើលឃើញថា មានការគំរាមកំហែងដល់អាយុជីវិតរបស់ខ្លួន។ អ្វីដែលកាន់តែធ្ងន់ធ្ងរជាងនេះទៅទៀត លោកបានប្រកាសដាច់អហង្ការថា អ៊ីស្រាអែលនឹងមិនដកទ័ពចេញពីតំបន់ព្រំដែនវិញជាដាច់ខាត រហូតទាល់តែក្រុមហេសបូឡា ទម្លាក់អាវុធទាំងស្រុង និងលែងក្លាយជាការគំរាមកំហែង សម្រាប់ប្រជាជនអ៊ីស្រាអែលតទៅទៀត។

លោក ណេតាន់យ៉ាហ៊ូ បានចាត់ទុកក្រុមហេសបូឡា ថាជាសម្ព័ន្ធមិត្តដ៏សំខាន់បំផុតរបស់ប្រទេសអ៊ីរ៉ង់។ លោកបានទម្លាយទិន្នន័យថា បច្ចុប្បន្ន គ្រាប់រ៉ុក្កែតរបស់ក្រុមនេះ នៅសល់តែប្រហែល ៨ភាគរយប៉ុណ្ណោះ ធៀបនឹងចំនួនពីមុន​ ដែលមានរហូតដល់ទៅ ១៥០ ០០០គ្រាប់។ ជាមួយគ្នានេះ អ៊ីស្រាអែលក៏បានសម្លាប់សមាជិកក្រុមនេះប្រមាណ ៩ ០០០នាក់រួចមកហើយ នៅក្នុងប្រទេសលីបង់។ លោកយល់ឃើញថា វិធានការដ៏មានប្រសិទ្ធភាពបំផុត គឺការបង្កើត «តំបន់ទ្រនាប់សុវត្ថិភាព» ចន្លោះទឹកដីរបស់ក្រុមហេសបូឡា និងប៉ែកខាងជើងនៃប្រទេសអ៊ីស្រាអែល។

ថ្វីដ្បិត​តែបែបនេះ​ក្ដី បើក្រឡេកទៅមើលខាងរដ្ឋាភិបាលលីបង់ និងក្រុមហេសបូឡាវិញ ពួកគេបានចេញមុខមកថ្កោលទោស ដោយចាត់ទុក «តំបន់សុវត្ថិភាព» ដែលអ៊ីស្រាអែលបង្ខំបង្កើតឡើងតែ​ឯងនេះ ថាជាការចូលឈ្លានពាន និងរំលោភលើច្បាប់អន្តរជាតិយ៉ាងធ្ងន់ធ្ងរ។ យោងតាមការគណនាពីប្រព័ន្ធផ្សព្វផ្សាយនៅក្នុងប្រទេសលីបង់ ទឹកដីនៅភាគខាងត្បូងដែលអ៊ីស្រាអែល កំពុងគ្រប់គ្រងនាពេលនេះ មានទំហំប្រហែល ៦២០គីឡូម៉ែត្រការ៉េ ដែលស្មើនឹង ៦ភាគរយនៃផ្ទៃដីសរុបរបស់ប្រទេសលីបង់ទាំងមូល៕

ប្រែសម្រួល៖ ឈាង