អ៊ីរ៉ង់ ធានាទៅអាមេរិកថា ខ្លួនមិនធ្វើឃាតលោក ត្រាំ ឡើយ

ក្នុងសេចក្តីរាយការណ៍របស់ RT កាលពីចុងសប្តាហ៍កន្លងទៅ ប្រទេសអ៊ីរ៉ង់ បានធានាថា ខ្លួននឹងមិនធ្វើឃាតលោក ដូណាល់ ត្រាំ ឡើយ ហើយការអះអាងបែបនេះ ធ្វើឡើងតាំងតែពីពាក់កណ្តាលខែតុលាឯណោះ ពោលគឺមុនសហរដ្ឋអាមេរិក រៀបចំការបោះឆ្នោតប្រធានាធិបតីទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេស្គាល់ថា លោក ត្រាំ គឺជាអ្នកមិនសូវពេញចិត្តអ៊ីរ៉ង់ឡើយ ជាក់ស្តែងលោកបានដកសហរដ្ឋអាមេរិក ចេញពីកិច្ចព្រមព្រៀងនុយក្លេអ៊ែរដ៏សំខាន់ជាមួយទីក្រុងតេហេរ៉ង់ក្នុងឆ្នាំ២០១៨ និងដាក់ទណ្ឌកម្មសេដ្ឋកិច្ចយ៉ាងធ្ងន់ធ្ងរជាបន្តបន្ទាប់ទៀតផង។ ជាពិសេសក្នុងឆ្នាំ២០២០ លោក ត្រាំ បានអនុញ្ញាតឲ្យធ្វើឃាតមេទ័ពអ៊ីរ៉ង់លោក Qassem Soleimani ថែមទៀត។

ទោះបីជាយ៉ាងណាក៏ដោយ សារព័ត៌មានអាមេរិកជាច្រើនបានចុះផ្សាយថា លិខិតធានារបស់អ៊ីរ៉ង់នេះ គឺមានគោលបំណងបន្ធូរបន្ថយស្ថានការណ៍ក៏ដូចជាពង្រឹងទំនាក់ទំនងរវាងប្រទេសទាំងពីរឡើងវិញ ពេលលោកដូណាល់ ត្រាំ ជាប់ឆ្នោតជាប្រធានាធិបតីអាមេរិកទី៤៧។

របាយការណ៍អំពីការធានារបស់ទីក្រុងតេហេរ៉ង់ កើតឡើងបន្ទាប់ពីក្រសួងយុត្តិធម៌អាមេរិក អះអាងកាលពីសប្តាហ៍មុនថា មន្ត្រីអ៊ីរ៉ង់បានជួលជនជាតិអាហ្វហ្គានីស្ថានម្នាក់ ឲ្យធ្វើឃាតលោកត្រាំ នៅខាងក្នុងសហរដ្ឋអាមេរិក។

កាលពីខែសីហា ក្រសួងយុត្តិធម៌ ក៏ចោទប្រកាន់ដែរថា អ៊ីរ៉ង់បានបញ្ជូនជនជាតិប៉ាគីស្ថានម្នាក់ទៅសហរដ្ឋអាមេរិក ដើម្បីធ្វើឃាតលោកត្រាំ ប៉ុន្តែទីក្រុងតេហេរ៉ង់ ​បានទាត់ចោលការចោទប្រកាន់ទាំងនេះថា គ្មានមូលដ្ឋាននិងជាការប្រតិដ្ឋ៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់​រំពឹង​ចរចា​កម្មវិធី​នុយក្លេអ៊ែរ​​ឡើង​វិញ​ឆាប់​ៗ ​ក្រោយអាក់​ខាន​ជាង​កន្លះ​ទសវត្សរ៍​​រួតរឹតដោយ​វិបត្តិ​