ព័ត៌មានអន្ដរជាតិ

ការចំណាយលើវិស័យការពារជាតិរុស្ស៊ី កើនឡើងខ្លាំង ស្មើនឹង១ភាគ៣នៃថវិកាជាតិ

បានផុស

២ years មុន

នៅ

ថ្ងៃអង្គារ ៣ ធ្នូ ២០២៤

ដោយ

Chheang

លោក វ៉្លាឌឺមៀរ ពូទីន ប្រធានាធិបតីរុស្ស៊ី បានអនុម័តលើកញ្ចប់ថវិកាការពារជាតិចំនួន ១២៦ពាន់លានដុល្លារ ដែលស្មើនឹង ៣២,៥% នៃការចំណាយទាំងអស់របស់រដ្ឋាភិបាល សម្រាប់ឆ្នាំ២០២៥ខាងមុខ។ វាជាតួលេខកំណត់ត្រាថ្មីមិនធ្លាប់មានសម្រាប់វិស័យការពារជាតិរុស្ស៊ី នៅក្នុងរយៈពេល៣ឆ្នាំជាប់ៗគ្នា ក្រោយផ្ទុះសង្គ្រាមជាមួយអ៊ុយក្រែន នៅក្នុងខែកុម្ភៈឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថវិកាការពារជាតិឆ្នាំ២០២៥របស់រុស្ស៊ី គឺច្រើនជាងឆ្នាំ២០២៤ ចំនួន ២៨ពាន់លានដុល្លារ ខណៈបច្ចុប្បន្ន បញ្ហាប្រឈមនៃសេដ្ឋកិច្ច និងប្រជាជនកំពុងកើនឡើងគួរឲ្យកត់សម្គាល់។ អតិផរណានៅរុស្ស៊ី បានកើនឡើងខ្ពស់ ហើយក្រុមហ៊ុនជាច្រើនកំពុងមានកង្វះខាតបុគ្គលិក។ ដើម្បីគ្រប់គ្រងស្ថានការណ៍ដ៏អាក្រក់នេះ ធនាគារកណ្ដាលរុស្ស៊ី បានដំឡើងការប្រាក់ដល់ ២១% កាលពីខែតុលា ដែលជាការប្រាក់ខ្ពស់បំផុតមួយនៅក្នុងរយៈពេលជាច្រើនសិបឆ្នាំមកនេះ។

សង្គ្រាមរុស្ស៊ីឈ្លានពានអ៊ុយក្រែន គឺជាជម្លោះប្រដាប់អាវុធធំជាងគេនៅអឺរ៉ុប គិតចាប់តាំងពីចប់សង្គ្រាមលោកលើកទី២។ ភាគីទាំងពីរនៃសង្គ្រាមអាយុកាលជិត៣ឆ្នាំនេះ សុទ្ធតែរងផលប៉ះពាល់លើធនធានរៀងៗខ្លួនរបស់ពួកគេ។

យ៉ាងណាមិញ ខុសពីរុស្ស៊ី អ៊ុយក្រែនបានទទួលការគាំទ្រពីសម្ព័ន្ធមិត្តលោកខាងលិចក្នុងចំនួនទឹកប្រាក់រាប់ពាន់លានដុល្លារ។ តួយ៉ាង ដូចកាលពីថ្ងៃចន្ទ លោក Olaf Scholz អធិការបតីអាល្លឺម៉ង់ បានប្រកាសពីកញ្ចប់ជំនួយយោធា ៦៨៤លានដុល្លារសម្រាប់អ៊ុយក្រែន។

លោក Scholz បាននិយាយថា នៅឆ្នាំ២០២៥ អាល្លឺម៉ង់ នឹងដឹកខែលការពារអាកាស រួមទាំងប្រព័ន្ធមីស៊ីល Patriot ផលិតនៅអាមេរិក ឲ្យរដ្ឋាភិបាលក្រុងកៀវ៕

ដោយ៖ ឈាង