Los Angeles កើតភ្លើងឆេះព្រៃច្រើនឡើងៗ បន្ថែមទៀត ឈានដល់កម្រិតគ្រោះថ្នាក់ធ្ងន់ធ្ងរបំផុត ពិបាកគ្រប់គ្រង

ស្ថានភាពភ្លើងឆេះព្រៃនៅ Los Angeles មិនទាន់ធូរស្រាលឡើយ ប៉ុន្តែបែរជាកាន់តែកញ្ជ្រោលខ្លាំងឡើងៗឈានដល់កម្រិតគ្រោះថ្នាក់ធ្ងន់ធ្ងរបំផុតទៅវិញ ហើយមានភ្លើងឆេះព្រៃជាច្រើនបានឆាបឆេះជាបន្តបន្ទាប់ បើទោះបីជាកងកម្លាំងបើកប្រតិបត្តិការពន្លត់និងទប់ស្កាត់ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លើងឆេះព្រៃថ្មីបានឆាបឆេះឡើងនៅជ្រលង Eaton, San Fernando និងទីក្រុង Altadena នៃតំបន់ Los Angeles​ ខណៈបច្ចុប្បន្ន ស្ថានភាពភ្លើងឆេះទាំងមូលគឺបានរីកធំជាងមុនដល់ទៅទ្វេដងឯណោះ។

គិតត្រឹមពេលនេះ ភ្លើងបានឆាបឆេះលើផ្ទៃដី ១ ១៨២ហិកតាហើយ ហើយកត្តាចម្បងដែលអគ្គិភ័យឆេះរាលដាលក្នុងល្បឿនដ៏លឿនបែបនេះគឺដោយសារតែព្រៃស្ងួតនិងខ្យល់បក់ខ្លាំង។

ប្រមុខផ្នែកអគ្គិភ័យ Los Angeles លោក Kristin Crowley ប្រាប់ទៅអ្នកសារព័ត៌មាននៅថ្ងៃពុធទី៨ខែមករាឆ្នាំ២០២៥ថា មនុស្សជាង ៣០ ០០០នាក់ត្រូវបានជម្លៀស ហើយអគារប្រមាណ ​១៣ ០០០អគារ បូករួមទាំងសំណង់ល្បីៗមួយចំនួនផងដែរ ត្រូវរងការគំរាមកំហែងដោយសារអគ្គិភ័យ។

តាមការឲ្យដឹងពីពលរដ្ឋក្នុងតំបន់, «អគ្គិភ័យនេះពិតជាកាចសាហាវណាស់ វាប្រៀបបាននឹងឋាននរក។ នៅជុំវិញយើងគឺសុទ្ធតែភ្លើង យើងភ័យខ្លាចមែនទែន»។

សូមបញ្ជាក់ជាថ្មី អគ្គិភ័យនេះផ្តើមឡើងក្នុងតំបន់ Pacific Palisades កាលពីថ្ងៃអង្គារទី៧ខែមករាឆ្នាំ២០២៥ ហើយក៏រាលដាលក្នុងល្បឿនយ៉ាងលឿន ឈានដល់ទីក្រុង Los Angeles ប្រកាសអាសន្ន ហើយក្រោយមក កងពន្លត់អគ្គិភ័យរាប់រយនាក់ ដោយមានជំនួយពីយន្តហោះ ត្រូវបានបញ្ជូនទៅដើម្បីបើកប្រតិបត្តិការពន្លត់ភ្លើង។

មកទល់ពេលនេះ មិនទាន់មានសេចក្តីរាយការណ៍អំពីជនរងគ្រោះទេ ប៉ុន្តែអាជ្ញាធរព្រមានថា ស្ថានភាពនឹងកាន់តែអាក្រក់ក្នុងរយៈ២៤ម៉ោងក្រោយ ខណៈមូលហេតុបង្កជាភ្លើងឆេះព្រៃ ក៏គេនៅមិនទាន់ដឹងនៅឡើយដែរ ស្របពេលអាជ្ញាធរកំពុងស៊ើបអង្កេត៕

អត្ថបទ៖ សុខ សុវណ្ណ

ចុចអាន៖ ទីក្រុង Los Angeles ប្រកាសអាសន្ន ខណៈភ្លើងឆេះព្រៃយ៉ាងសាហាវ កំពុងរាលដាលខ្លាំង